Tegin medıtsınalyq qyzmetti aqyly túrde usynǵan emhanalar anyqtaldy
NUR-SULTAN. QazAqparat - QR Memlekettik qyzmet isteri men sybaılas jemqorlyqqa qarsy is-qımyl agenttigi elordalyq medıtsınalyq uıymdarda «jasyryn satýp alýshy» tásilimen júrgizilgen monıtorıng nátıjesin jarııalady, dep habarlaıdy QazAqparat tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl agenttigi Memlekettik qyzmetter departamentiniń dırektory Ildar Úısimbaev qyzmet kórsetý erejelerin buzǵan elordalyq emhanalardy atady.
«Kepildi medıtsınalyq kómek alý úshin, ıaǵnı aýmaqtyq dáriger men tar sheńberli mamandardyń qabyldaýy, dıagnostıka men medıtsınalyq tekserýler, balalar men júktilerge qamqorlyq jasaý, dárigerdi úıge shaqyrý jáne statsıonarǵa joldama alý úshin turǵyndar medıtsınalyq uıymǵa tirkelýleri qajet. Ol úshin jeke kýálikti kórsetý jetkilikti. Alaıda, tekserýde №7 jáne 10 qalalyq emhanalarǵa tirkelýde azamattardyń jeke kýálik qujattarynyń kóshirmesi men flıýrografııalyq sýretteri negizsiz suralǵan. Bul rette, naýqastarǵa emhananyń ózinen rentgendik tekserýden ótýdi 1500 teńgege usynylǵan. Medıtsınalyq uıymǵa tirkelgen jáne emdeýshi dárigerdiń tıisti joldamasyn alǵan naýqas rentgendik tekserýden tegin ótýi kerek», - dedi I. Úısimbaev Astanada Sybaılas jemqorlyqqa qarsy Ulttyq bıýroda ótken baspasóz máslıhatynda.
Tekserý barysynda atalǵan medıtsınalyq uıymdarǵa tirkelý 3 jumys kúni ishinde kórsetilgen, al erejege sáıkes naýqas 1 jumys kúninde tirkelýi tıis.
«Artyq qujattardy suraý faktileri men memlekettik qyzmetterdi kórsetý merziminiń buzylýy №9 qalalyq medıtsınalyq uıymy men «Shıpager» otbasylyq densaýlyq ortalyǵynda da anyqtaldy. Budan basqa, elektrondyq kezek bolmaı, «jandy» kezektiń kóbeıýi, dáriger qabyldaýyna elektrondy jazylý múmkindigi bola tura, jýrnalǵa jazylý faktileri anyqtaldy. Sondyqtan monıtorıng kezinde emhanalardan uzyn-sonar kezekter baıqaldy, bul azamattardyń obektıvti narazylyǵyna ákep soqty», - dep sózin jalǵastyrdy departament basshysy.
I. Úısimbaevtyń aıtýynsha, medıtsınalyq qyzmetterdi alýda dál osyndaı zańnamanyń buzylýy Aqmola, Atyraý, Batys Qazaqstan, Shyǵys Qazaqstan, Qaraǵandy, Qostanaı, Mańǵystaý, Pavlodar, Soltústik Qazaqstan, Aqtóbe oblystarynda anyqtalǵan.
