Tegin medıtsınalyq kómektiń jańartylǵan tizimi jarııalanady
«Aǵymdaǵy jyly sáýir aıynyń aıaǵyna deıin tegin medıtsınalyq kómektiń kepildendirilgen kólemine qatysty jańa jobany Úkimettiń qaraýyna engizýdi tapsyramyn. Tegin medıtsınalyq kómektiń tarıfterin qaıta qarap, naqty shyǵyndarǵa sáıkestendirý kerek. Sondaı-aq, mindetti áleýmettik medıtsınalyq saqtandyrýdyń paketin kórsetýi qajet. Bul - úlken mindet. Sebebi tegin medıtsınalyq kómekti qaıta qaraý arqyly biz memlekettiń naqty mindetin anyqtaı alamyz. Patsıentter de, dárigerler de tegin dári-dármektiń tizimin kóre alady. Al tarıfterdi kóterýdiń nátıjesinde jalaqy da kóteriledi», - dedi E.Dosaev Densaýlyq saqtaý mınıstrliginiń keńeıtilgen alqa májilisinde.
Onyń aıtýynsha, árbir medıtsınalyq mekemede tegin medıtsınalyq kómek pen mindetti áleýmettik medıtsınalyq saqtandyrý aıasyndaǵy qyzmetterdiń naqty tizimi bolýy qajet. Budan bólek, Úkimet basshysynyń orynbasary mindetti áleýmettik medıtsınalyq saqtandyrý júıesin kelesi jyldan bastap engizýge qatysty barlyq daıyndyq sharalaryn ýaqytynda jasaýdy tapsyrdy.
Aıta keteıik, atalǵan mınıstrliktiń alqa májilisi kezinde QR Premer-Mınıstriniń orynbasary Erbolat Dosaev xalyqty dári-dármekpen qamtamasyz etý salasyndaǵy tártip buzýshylyqtardy da atady.