Tegin medıtsınalyq kómek: Dári-dármekterdi satyp alýǵa arnalǵan biryńǵaı portal ázirlendi
ASTANA. QazAqparat - Atalǵan portal ázirshe testtik rejımde jumys isteıdi. Al bir aptadan keıin tolyǵymen iske qosylady. Sodan bastap tegin medıtsınalyq kómek aıasynda barlyq preparattar osy portal arqyly satyp alynady, dep xabarlaıdy QazAqparat tilshisi.
«SK-Farmatsııa» AQ basqarma tóraǵasynyń mindetin atqarýshy Berik Sháriptiń aıtýynsha, jańa portal Qarjy mınıstrliginiń «Elektrondy kommertsııa ortalyǵy» AQ-symen birlesip ázirlendi.
«Buǵan deıin biz komıssııalardyń otyrystaryn onlaın rejımde kórsettik. Sóıtip, barlyq satyp alý sharalaryn ashyq júrgizýge tyrysqan edik. Endi osynyń bári avtomatty túrde atqarylady. Biz Qarjy mınıstrliginiń memlekettik satyp alýlar portalyn negizge alyp, óz portalymyzdy ázirledik. 19-26 shilde aralyǵynda portal testtik rejımde jumys isteıdi. Osy ýaqyttyń ishinde taýar jetkizýshi kompanııalar portaldy jan-jaqty zerttep, tirkelý jáne ótinim berýdi úırene alady. Negizi, saıttyń ınterfeısi jeńil. Al shildeniń aıaǵynan bastap biz barlyq satyp alýlardy portal arqyly júrgizýdi bastaımyz», - deıdi B.Shárip.
Onyń aıtýynsha, sk-pharmacy.ecc.kz saıtyna aldymen tirkelý kerek. Ol úshin qatysýshynyń tsıfrlyq qoltańbasy qajet. Osydan keıin árbir kompanııa dári-dármekterdiń baǵasyn usynady. «Aýktsıon kezinde eń tómen baǵa usynǵan kompanııa jeńedi. Bul degenimiz, básekelester óz baǵalaryn tómendete beredi. Naqty shekteý joq. Kim eń tómen baǵamen satýdy usynsa, sol jeńimpaz atanady», - dep atap kórsetti B.Shárip.
