Tegin qyzmet kórsetetin medıtsına uıymdaryna jyl basynan 396,9 mlrd teńge bólindi
ASTANA. QazAqparat - «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy jyl basynan beri Qazaqstandaǵy medıtsına uıymdaryna 396,9 mlrd teńge kóleminde qarjy bóldi, dep habarlaıdy qordyń baspasóz qyzmeti.
Habarlamaǵa súıensek, 2018 jylǵy shildeniń 9-yna deıin Qormen kelisimshart bekitken medıtsına mekemelerine 396,9 mlrd teńge berilgen.
«Bul - kepildendirilgen tegin medıtsınalyq kómek sheńberinde kómek kórsetý jóninde bekitilgen kelisimsharttrdyń jalpy somasynyń 56 paıyzy», - deıdi MSQ basqarma tóraǵasynyń orynbasary Botagóz Jaqselekova.
Tegin medıtsınalyq kómek jáne áleýmettik medıtsınalyq saqtandyrý paketteriniń qarjylyq operatory bolyp sanalatyn Qor emdeý mekemelerimen halyqqa tegin kómek kórsetý jóninde kelisimsharttar bekitken bolatyn. Bekitilgen kelisimsharttardyń jalpy somasy 704,5 mlrd teńgeni quraǵan.
«Jumys kestesine saı, medıtsınalyq qyzmet sapasyn baqylaý jańa talaptarǵa sáıkes júrgizilip jatyr. Bólingen qarajat medıtsına mekemeleriniń operatsııalyq shyǵyndaryn óteýge jetkilikti», - deıdi B.Jaqselekova.
Esterińizge sala ketsek, búgingi tańda Qor memlekettik tapsyrys boıynsha qyzmet kórsetýge nıet bildirgen 1359 medıtsına uıymymen kelisimshart bekitken. Onyń 599-y - jekemenshik klınıkalar. Bıylǵy jeke klınıkalar sany 2017 jylmen salystyrǵanda 138-ge kóbeıgen. Al, olarmen bekitilgen kelisimshart somasy ótken jylǵydan 2 ese artyp, 93,5 mlrd teńgeni qurady.
