«Tegin EKO» jobasy arqyly uzaq jyl bala kútken 5 otbasy sábı súıdi

Bedeýlik dertine shaldyqqan otbasylyq juptarǵa kómek kórsetý maqsatynda 2022 jyly Láılá Sultanqyzy Instagram áleýmettik jelisinde «Tegin EKO» atty bastama kótergen bolatyn. Bul bastamaǵa «Ańsaǵan sábı» memlekettik kvotasyna belgili sebepterge baılanysty iline almaǵan, birneshe márte óz qarajattaryna EKO jasaýǵa talpynǵan, genetıkalyq dertke baılanysty sábıli bola almaǵan otbasylardy tańdap alǵan edi.

Elimizde EKO baǵdarlamasyn jasatýdyń ortasha quny 2 mln teńgeni quraıdy. Bundaı kólemdegi qarajatty jınaýǵa Láılá Sultanqyzynyń oqyrmandary men qaıyrymdy jandar kómek kórsetken. Odan bólek eń úlken qoldaý kórsetken jandardyń qatarynda elimizge eń alǵashqylardyń biri bolyp EKO baǵdarlamany qalyptastyrǵan embrıolog-reprodýktolog Saltanat Baıqoshqarova jáne «Ecomed» ujymy bar.

Igi bastama nátıjesinde ár óńirden bes jup EKO baǵdarlamadan ótti. Olardyń tórteýinde birinshi retten jasalǵan embrıon tasymalynan keıin júktilik anyqtalyp, aıy-kúni jetken shaqta ul-qyzdaryn baýyryna basty.

Qyzylordalyq Aınur esimdi besinshi patsıent tek úshinshi retten júkti bolyp 10 tamyz kúni Mıras esimdi ul balany dúnıege ákeldi. Aınur bizge hat joldaǵan bolatyn:

«Otbasy qurǵanymyzǵa 12 jyl boldy. Tabıǵı jolmen 2 ret kóterdim. 2012 jyly júktiliktiń 8 aptasynda, 2014 jyly ekinshi júktilik 7-8 aptasynda bala ómir súrýin toqtatty dep alyp tastady. 2016 jyly Shymkentte «Brak ı semıa» klınıkasynda óz qarajatymmen EKO jasattym, sátsiz boldy. Kvotaǵa kezekte turǵanyma 4 jyl boldy. Qazir jasym 41-de, 2022 jyldyń mamyr aıynda 42-ge tolamyn. Joldasym úıdiń jalǵyz balasy, urpaqsyz qala ma dep qorqamyn, ózimniń de ana atanǵym keledi. Kómektesizder me? Ótinip suraımyn. Óıtkeni eki ret sátsiz ekodan keıin úmitim úzilip, qatty stress aldym, jumysqa shyqpaı, úıde jatyp qaldym. Osy ýaqytqa sheıin 10 mıllıondaı aqshamyz ketti. Jumys isteımiz, bolnıtsaǵa qaralamyz, analız tapsyryp, emdelemiz, sóıtip arasynda joǵaryda aıtqandaı ómirimiz ótti. Otbasymyzda sábıdiń ıisi men úni estilip, baqytty shańyraqqa aınalsaq eken. Otbasymdy saqtaýǵa kómek berińizdershi. Uıqysyz túnderim men jylaǵan kúnderimdi umytqym keledi».

Osyndaı sharasyz kúıde hat joldaǵan Aınur biraz synaqtan ótip, búginde joldasy Meırambek ekeýi ata-ana atandy. Aınur men balanyń jaǵdaıy qalypty bolǵannan keıin dárigerlerdiń ruqsatymen kúni keshe 23 tamyzda Qyzylorda qalasynyń Ana men bala ortalyǵynan úıge shyqqan bolatyn.

Osylaısha, jaı ǵana Instagram jelisinde bastaý alǵan qaıyrymdylyq aktsııasy kópshilikten qoldaý taýyp, bıyl Jibek Joly telearnasynan Láılá Sultanqyzynyń avtorlyq baǵdarlamasy retinde «Ana bolǵym keledi» degen ataýmen kórermenge jol tartty. Alǵashqy maýsymda taǵy da qaıyrymdy jandardyń kómegimen alty patsıent tańdap alyndy.

Arada biraz ýaqyt ótken soń Láılá Sultanqyzy «MARIYAM» degen ataýmen qaıyrymdylyq qoryn ashyp, nátıjesinde taǵy bes jup EKO baǵdarlamadan ótýge múmkindik aldy.

Búginde jalpy sany 11 jup EKO baǵdarlamadan ótýde. Jyl sońyna deıin bul kórsetkishti 20-ǵa deıin jetkizý josparda bar. Osy ýaqytqa deıin 12 embrıon tasymaly jasaldy.

Ázirge 3 júktilik anyqtaldy.

EKO baǵdarlamany júrgizip, patsıentterge medıtsınalyq-moraldik turǵyda kómek kórsetip jatqan bilikti reprodýktolog-dáriger Almaz Qurmanáliulynyń jáne áriptesteri Botagóz Serikbaıqyzyn, Islam Dáýrenulynyń eńbegi zor.

Osy ýaqytqa deıin «MARIYAM» qaıyrymdylyq qorynyń saıtyna kómek suraǵan jandardan 1000-nan astam hat kelip tústi. Ár hatty bizdiń dárigerler muqııat qarap, hattyń mazmunyn, dıagnozyn talqylaıdy. Nátıjesinde dıagnozy aýyr, jasy úlken, bala kóterý múmkindigi tómendeý degen qıyn jaǵdaılardy tańdaıdy.

Qordyń jáne dárigerlerdiń maqsaty – sónip bara jatqan úmitti qaıta jalǵaý, múmkin emes degen nárseni eń áýeli Qudaıdyń jáne medıtsınanyń kómegimen múmkin etý. Qoǵamda jıi kezdesetin ózekti problemalardyń biri bedeýliktiń sanyn azaıtý jolynda aýdıtorııany saýatty aqparattandyrý, osy dıagnozǵa dýshar bolǵan juptarǵa kómek kórsetý – «MARIYAM» qaıyrymdylyq qorynyń basty mıssııasy.