Tegin dárini satý boıynsha 27 qylmystyq is qozǵalǵan
Bul týraly QR Densaýlyq saqtaý mınıstri Eljan Birtanov Ortalyq kommýnıkatsııalar qyzmetinde ótken brıfıngte málim etti.
Mınıstrdiń sózine qaraǵanda, elimizde jyl saıyn 3 mln tegin dári retsepti jazylatyn kórinedi. Alaıda osy dárini jekemenshik dárihanalarǵa satyp, ońaı olja tabatyndar paıda bolǵan.
«Tegin beriletin dári-dármektiń elge jetpeı jatqany týraly shaǵym kóbeıgennen keıin SMS-eskertý júıesin iske qosqanbyz. Naýqasqa tegin dári retsepti berilgeni týraly aqparat bazaǵa túsken sátte emdelýshige SMS-habarlama jiberiledi. Sondaı SMS alǵan 4000 adam, ózderine eshqandaı dári berilmegenin aıtyp shaǵymdanǵan. Bul jerde kóptegen faktor bar. Tipti naýqastyń telefon nómiri ózgerip ketken jaǵdaılar da boldy. Memleket tarapynan satyp alynǵan dári-dármekti jeke dárihanalarǵa satý jaǵdaılary da tirkeldi. Bul faktorlar boıynsha quqyq qorǵaý organdarymen birlesip jumys júrgizilip jatyr. Atalmysh zańsyzdyqqa baılanysty 27 qylmystyq is qozǵaldy», - dedi Eljan Birtanov.
Ol sondaı-aq, dári satyp alýǵa qatysty tenderdi ashyq júrgizýdiń arqasynda mıllıardtaǵan qarjy únemdelip jatqanyn aıtty.
«Dár-dármek naryǵyn meılinshe ashyq qylý úshin úshinshi jyl qatarynan jumys istep jatyrmyz. Byltyr ashyq tender ótkizýdiń arqasynda 26 mlrd teńge únemdeldi. Bul aqsha qosymsha dári alýǵa jumsaldy», - dedi mınıstr.
Vedomstvo basshysynyń aıtýynsha, ótken jyly barlyq óńirlerden 129 mlrd teńgege tegin dári ótinimi berilgen. Biraq keıinnen ákimdikter onyń 14 mlrd teńgesinen bas tartqan.