Tegin dári-dármekpen qamtamasyz etýdiń jaǵdaıy qandaı
Atap aıtqanda, «SQ-Farmatsııa» kezekti satyp alý rásiminiń qorytyndysyn shyǵardy. Osylaısha, buryn satyp alynǵandarǵa taǵy 41 tegin preparat qosyldy. Olardyń arasynda gıpertenzııaǵa qarsy preparattar, antıbıotıkter, sondaı-aq onkologııalyq, ókpe aýrýlary, AITV, gemofılııa, gepatıt jáne basqa da syrqattary bar naýqastardy emdeýge arnalǵan dáriler bar.
2018 jylǵy 15 qańtarda Biryńǵaı dıstrıbıýterdiń saıtynda jyldyń alǵashqy úsh aıynda dári-dármekpen qamtamasyz etý úshin buryn satyp alynbaǵan preparattar boıynsha satyp alý qorytyndysynyń hattamasy jarııalandy. Budan basqa, qazirge deıin uzaq merzimdi sharttar boıynsha otandyq óndirýshilerden taǵy 39 jáne sheteldik óndirýshilerden tikeleı 4 dári-dármek túri qosymsha satyp alynǵan.
«Osylaısha, búginge deıin Biryńǵaı dıstrıbıýter dárilik zattar men medıtsınalyq maqsattaǵy zattardyń 971 ataýyn satyp aldy. «SQ-Farmatsııa» derekterine súıensek, qazirdiń ózinde tegin statsıonarlyq jáne ambýlatorııalyq dári-dármekpen qamtamasyz etý úshin satyp alynatyn medıkamentter tizimine enetin 1192 ataýdyń 82 paıyzyn satyp alý júrgizilgen. Endi ónim berýshilermen sharttar jasalýda, olar boıynsha taýar Biryńǵaı dıstrıbıýterdiń qoımalaryna aqpan aıynda jetkizile bastaıdy», - delingen taratylǵan baspasóz baıanynda.
Sonymen qatar, aýrýhanalar, emhanalar men tegin preparattar taratatyn dárihanalar úshin Biryńǵaı dıstrıbıýterdiń qoımalarynda bar dárilik zattardy jóneltý bastalyp ketti. Jańadan satyp alynǵan preparattardy jóneltý medıtsınalyq uıymdarmen bekitilgen kestege sáıkes bastalatyn bolady.
«Osy tusta qazirgi kezde sáýir aıynan jeltoqsan aıyna deıingi dárilik zattarǵa 9 aılyq qajettilikti satyp alý úshin eki kezeńdik tenderlik protsedýralar ótkizilip jatqanyn aıta ketken jón. Tender qorytyndysy 2018 jylǵy 2 aqpanda shyǵarylyp, dári-dármekti jetkizý naýryz aıynda bastalatyn bolady», - dep naqtylandy «SQ-Farmatsııa» baspasóz qyzmetinen.
