Tegin dári-dármek: Alǵashqy eki aıda naýqastarǵa 1,1 mln retsept jazyp berildi
ASTANA. QazAqparat - QR DSM Farmatsııa komıteti tóraǵasynyń orynbasary Erjan Júnisov tegin dári-dármekti naýqasqa jetkizý maqsatynda qandaı jumystar atqarylyp jatqanyn aıtyp berdi, dep habarlaıdy QazAqparat tilshisi.
«Tegin dári-dármekti alý quqyǵy 2019 jylǵa arnalǵan tizimge sáıkes, 1184 pozıtsııany qurap otyr. Bul dıspanserlik esepte turǵan, sonymen qatar statsıonarlyq emdelýdegi jalpy patsıentterge qatysty bolyp keledi. Tegin dári-dármekpen ýaqtyly qamtamasyz etý maqsatynda 2018 jyldyń tamyz aıynan bastap tolyǵymen satyp alý protsedýrasy bastalyp, qazirgi ýaqytta dári-dármekter medıtsınalyq uıymdarǵa jóneltilip jatyr. Sol sekildi osy jylǵa bólingen qarajat boıynsha dári-dármekterdiń 94 paıyzy satyp alynyp, tıisti jumystar ary qaraı jalǵasýda», - deıdi Erjan Júnisov.
Komıtet tóraǵasynyń orynbasary atap ótkendeı, ambýlatorııalyq qamtamasyz etý máselesine basa nazar aýdarylyp otyr.
«Medıtsınalyq uıymdar 499 dári-dármek túriniń qajettigi týraly habar bergen bolatyn. Dıspanserlik esepte turǵan patsıentterdi qamtamasyz etý úshin dári-dármekterdi jóneltý qańtar aıynan bastap júrgizilýde. Qazirgi ýaqytta 25,4 mlrd teńgege dári-dármekter jóneltildi. Jyldyń alǵashqy eki aıynda 4,9 mlrd teńge somaǵa 1,1 mln retsept jazyp berilgen», - deıdi Erjan Júnisov.
Onyń aıtýynsha, 2019 jylǵa Biryńǵaı dıstrıbýtsııa júıesi arqyly satyp alý kezindegi únemdeý kólemi 19,6 mlrd teńgeni quraǵan.
«Aldaǵy ýaqytta únemdelgen qarajat densaýlyq saqtaý mınıstrliginiń bıýdjettik komıssııasynyń qaraýyna shyǵarylatyn bolady. Bul qarajatty tapshylyq anyqtalǵan jaǵdaıda dári-dármekterdi qosymsha satyp alýǵa nemese medıtsınalyq uıymdardyń basqa da muqtajdyqtaryna bólý týraly másele qaralady», - dep túsindirdi Erjan Júnisov.
Eske sala ketsek, QR Densaýlyq saqtaý mınıstrligi halyq tegin berilýi tıis dári-dármektiń satylymǵa shyqpaýyn qadaǵalaýdy kúsheıtken bolatyn. Mınıstr Eljan Birtanovtyń aıtýynsha, naýqastar tegin dári-dármekti alǵanyn SMS arqyly rastaıdy.
