Tegin dári-dármek: 1439 baılanys ortalyǵy jumys isteıdi
ASTANA. QazAqparat - Búginde 2019 jylǵa arnalǵan tegin beriletin dári-dármekterdiń 90% satyp alyndy. Bul týraly «SK-Farmatsııa» JShS basqarmasy tóraǵasynyń mindetin atqarýshy Berik Shárip aıtty, dep habarlaıdy QazAqparat tilshisi.
«Ústimizdegi jylǵa arnalǵan dárilik preparattardyń 90% satyp alynyp, búginde elimiz boıynsha qoımalarǵa jetkizý jumystary júrgizilýde. Kelesi aptadan bastap dáriler emhanalarǵa túse bastaıdy. Bıyl jalpy somasy 23 mlrd teńgege eseptelgen dári-dármek alyndy. Sondyqtan tegin dári boıynsha tapshylyq máselesi bolmaıdy, bastysy onyń durys jetkizilýi», - dedi Berik Shárip OKQ-de ótken baspasóz máslıhatynda.
Onyń aıtýynsha, 2019 jyly tegin qamtamasyz etý úshin satyp alynǵan dári-dármektiń tizimi 1144 quraıdy. Onyń ishinde, 45 aýrý túri boıynsha dıspanserlik esepte turǵan patsıentterdiń emine 421 dári-dármek belgilendi.
Odan bólek, B.Shárip halyqty tegin dári-dármekpen qamtamasyz etý qatań baqylaýǵa alynatynyn atap aıtty.
«Halyqty tegin dárilermen qamtamasyz etý boıynsha 1439 baılanys ortalyǵy jumys isteıdi. Ol arqyly kez-kelgen azamat dári-dármekti jetkizý merzimi, kólemi jáne josparlanǵan kúni týraly aqparatty bile alady. Sol sııaqty SMS júıesi bar, ol arqyly patsıent tıisti dárini ýaqytynda alǵan nemese almaǵany týraly aqparat bere alady», - dedi ol.
Buǵan deıin, elimizde dári-dármek baǵasynyń qalaı retteletini týraly habarlaǵan bolatynbyz.
