Tegin beriletin dárini satyp júrgender bar - Arnur Nurtaev

ASTANA. QazAqparat - "Dárilik zattardy, medıtsınalyq buıymdardy jáne tehnıkany saraptaý Ulttyq ortalyǵy" bas dırektorynyń orynbasary Arnur Nurtaev QR Densaýlyq saqtaý mınıstriniń tegin dári-dármekpen qamtý týraly synyna jaýap berdi, dep habarlaıdy QazAqparat tilshisi.

Eske sala ketsek, 23 aqpan kúni QR Densaýlyq saqtaý mınıstri Eljan Birtanov tegin dári-dármek aldy dep kórsetilgen keı naýqastardyń  shyn máninde eshqandaı dári almaǵanyn aıtyp, emhana basshylaryna bıýdjet qarajatyn tıimsiz paıdalanbaýdy tapsyrǵan edi.

"Basty sebepterdiń biri - naýqastyń dárini alýǵa kelmeýi. Árıne, odan da basqa sebepteri bar, qazir barlyq mán-jaı anyqtalyp jatyr. Árıne, aıyptylarǵa óte qatań sharalar qoldanylady, tipti keı mekemelerdi esep komıteti tekserýi de múmkin", - dedi Arnur Nurtaev Ortalyq kommýnıkatsııalar qyzmetinde ótken baspasóz máslıhatynda.

Nurtaevtyń aıtýynsha, qazirgi ýaqytta barlyq dárimen qamtamasyz etý jumysyna saraptama júrgizilip jatyr. Dárini naýqastyń atyna jazyp, biraq eshqandaı preparat bermeý boıynsha júzge jýyq oqıǵa anyqtalǵan.

"2017 jyly eki mıllıonǵa jýyq retsept berilgen. Eki mıllıon retseptini tolyq kólemde alǵanyn tekserý úshin kóp ýaqyt qajet. Munda respýblıka azamattarynyń da tekserý jumystaryna qatysyp, áleýmettik jaýapkershilik tanytýy úshin mınıstr Eljan Amantaıuly naýqastarǵa berilgen barlyq retsept boıynsha saraptama júrgizýdi tapsyrdy. Ázirge júzge jýyq dárini bermeı qalý oqıǵasy rastaldy", - dep óz sózin tolyqtyrdy ol.

Sondaı-aq, saraptama aıasynda tegin beriletin dárilerdiń satylymǵa shyǵarylǵany anyqtaldy.   

"Kepildendirilgen tegin kólem aıasynda satyp alynǵan, tegin beriletin dárilerdiń de dárihanaǵa satylymǵa qoıylǵany anyqtaldy. ıAǵnı, bir naýqas ózine tıesili dárini alǵan joq, ekinshi adam tegin dárini satyp, paıda kórip otyr. Bul másele boıynsha barlyq aqparatty tekseremiz jáne tolyq saraptama júrgizilgen soń, nátıjesin BAQ ókilderine mindetti túrde jarııalaımyz", - dep sózin túıindedi Arnur Nurtaev.