Tegin beriletin dári-dármekter qaıda ketip jatyr - Densaýlyq saqtaý mınıstri
ASTANA. QazAqparat - QR Densaýlyq saqtaý mınıstri Eljan Birtanov tegin medıtsınalyq dári-dármekterdi jetkizý máselesine qatysty pikir bildirdi, dep habarlaıdy QazAqparat tilshisi.
Mınıstrdiń aıtýynsha, eń aldymen dári-dármekke muqtaj syrqattardyń sanyn naqtylaý qajet.
«Bıyl dıspanserlik-sozylmaly naýqastar tizimin retke keltirýimiz qajet. Bizde dıspanserlik baqylaý tirkeýishi bar, ondaǵy kórsetkishter men sizderden kelip túsetin ótinimder ár túrli. ıAǵnı, derekter bazasyn bir júıege keltirý qajet. Sondyqtan, bıyl júrgiziletin tsıfrlandyrý jumystary dári-dármekke muqtaj qansha syrqat bar ekenin naqty kórsetip bere alady. Qazir derekter bazamyzdy «SK-Farmatsııa» JShS-men sáıkestendirdik jáne edáýir qaldyqty kórip otyrmyz. Bıyl josparlaý máselesin sheshemiz degen úmittemin», - dedi E. Birtanov Astana qalalyq densaýlyq saqtaý basqarmasy alqasynyń keńeıtilgen otyrysynda.
Sondaı-aq, Birtanov dári-dármek jetkizý máselesin endi boldyrmaý úshin jumys istep jatqandaryn jetkizdi.
«Satyp alýlardyń der kezinde júrgizilmegenin túsinemin. Bıyl shilde aıynda 2019 jylǵa arnalǵan satyp alýlardy bastaımyz. Jalpy alǵanda, ambýlatorııalyq-dárilik qamtamasyz etý úshin preparattardyń 90% satyp alǵynǵan jáne qazir dárilerdi túsirý jumystary júrip jatyr. Aqpan aıynyń sońynda deıin barlyq qajetti dári-dármekter jetkiziledi. (...) Aldaǵy ýaqytta atalǵan máselelerdi eskere otyryp, memlekettik qamtamasyz etý jumysyn jetildire túsý qajet», - dep óz sózin tolyqtyrdy mınıstr.
Odan bólek, E. Birtanov emhana basshylaryna naýqastarǵa dári-dármektiń tolyq berilýin qadaǵalaýdy, bıýdjettiń qarajatyn tıimsiz paıdalanbaýdy tapsyrdy.
«Keı azamattar emhanalardaǵy derekter bazasynda dárini aldy dep kórsetilip, shyn máninde almaǵan bolyp shyǵady. Bes júz adamǵa habarlasyp, dárini aldyńyz ba suraǵan edik. Kópshiligi almaǵan bolyp shyqty. Ol dáriler qaıda ketip jatyr? Emhanalardyń bas dárigerlerine aıtarym, bul óte ózekti másele. Bıýdjettiń qarajatyn tıimsiz jáne maqsatsyz qoldaný oqıǵasy bolmasyn», - dedi mınıstr.
Eske sala ketsek, 20 aqpan kúni Astana ákimi Áset Isekeshev tegin medıtsınalyq dári-dármekterdi jetkizý boıynsha ákimniń orynbasary Ermek Amanshaev pen densaýlyq saqtaý basqarmasynyń basshysy Qamaljan Nadyrovqa eskertý jasady. Munymen qosa qala basshysy atalǵan máselege qatysty jaǵdaıdy únemi baqylaýda ustaýdy tapsyrdy.
