Tegin alǵan 10 sotyq jer úı salýǵa jaramsyz bolsa, qaıtadan kezekke turýǵa bolady

NUR-SULTAN. QazAqparat – Memleketten jeke turǵyn úı salý úshin tegin alǵan 10 sotyq jer úı salýǵa jaramsyz bolsa, qaıta kezekke turýǵa bolady, dep habarlaıdy QazAqparat tilshisi.

Kezegi jetip, jeke turǵyn úı salýǵa jer telimin alǵanymen, ol aýmaq qurylysqa jaramsyz bolyp shyqqan turǵyndar ne isteı alady?

Mundaı jaǵdaıǵa tap bolǵan azamattarǵa ne isteý keregin QR Aýyl sharýashylyǵy mınıstrligi jer resýrstaryn basqarý komıtetiniń tóraǵasy Murat Temirjanov QazAqparttyń saýalyna joldaǵan jaýabynda túsindirdi.

«Ondaı jaǵdaıda siz jeke turǵyn úı qurylysy úshin tegin berilgen jer ýchaskesinen bas tartyp, qaıtadan kezekke tura alasyz», - dep jazylǵan jaýapta.

Vedomstvo basshysy jeke turǵyn úı qurylysyna arnalǵan jer kezeginiń saqtalýyn qaı organ qadaǵalaıtynyn da túsindirdi.

«Jergilikti atqarýshy organdar jeke turǵyn úı qurylysy úshin jer ýchaskesin alýǵa arnalǵan kezek tizimi týraly aqparatty toqsan saıyn keminde bir ret arnaıy aqparattyq stendte jáne buqaralyq aqparat quraldarynda qazaq jáne orys tilderinde jarııalaýǵa mindetti», - dep jazady Murat Temirjanov.

Atalmysh vedomstvonyń málimeti boıynsha, buryn 10 sotyq jerdi bireýden satyp alǵandar da tegin jer kezegine tura alady.