Tegerandaǵy ushaq apaty: Ýkraınalyq sarapshylar oqıǵa ornynda jumys isteýde
«Tótenshe jaǵdaılar jónindegi memlekettik qyzmet, Qorǵanys mınıstrligi, SІM, ІІM, Ýkraınanyń qaýipsizdik qyzmeti, Ulttyq qaýipsizdik jáne qorǵanys keńesi, Memlekettik avıatsııa qyzmeti, áýe apattary men oqıǵalaryn tergeý jónindegi ulttyq bıýro ókilderi azamattyq avıatsııamen jáne «Ýkraınanyń halyqaralyq áýe kompanııalarynyń» ókilderimen birlesip jumys jasaýda», - dep habarlady ol.
Aıta keteıik, AQSh memlekettik hatshysy Maık Pompeo Irandaǵy ýkraınalyq ushaq tehnıkalyq aqaýǵa baılanysty qulady degen boljam aıtty. AQSh bıligi Tegerandaǵy «Ýkraınanyń halyqaralyq áýe kompanııalarynyń» ushaǵynyń ázirge qulaý sebepterin bilmeıdi. Biraq olar tehnıkalyq aqaý bolýy múmkin ekenin joqqa shyǵarmaıdy. Bul týraly Maık Pompeo beısenbi kúni Fox News telearnasy efırinde málimdedi.
AQSh-tyń syrtqy saıasat vedomstvosynyń basshysynan Boeing 737 áýe laıneri Iran tarapynyń qatelesip atyp jiberýinen qulaýy múmkin degen aıyptaýlarǵa túsinikteme berýin surady.
«Tergeý jumystary júrip jatyr. Irandyqtar tolyǵymen tergeý sharalary boıynsha yntymaqtasatyn bolady dep úmittenemin», - dedi Pompeo. Ol Iranǵa ushý, sondaı-aq osy elden ushý qaýipsiz be, joq pa, sony barlyq álem bilýi tıis ekenin atap ótti. Pompeonyń aıtýynsha, eger qaýip bolatyn bolsa, áýe kompanııalaryna jolaýshylarǵa qaýip tóndirmeý úshin sheshim qabyldaýǵa týra keledi.
Óz kezeginde, Kanada premer-mınıstri Iran jolaýshylar laınerin abaısyzda atyp jibergen degen boljamyn jarııalady. Ol bul týraly senimdi túrde aıtý úshin kóp aqparat qajet ekenin atap ótti.
«Bolǵan jaǵdaı týraly suraqtarǵa jaýap alý úshin biz halyqaralyq resmı tulǵalarmen, tergeý boıynsha Iranmen jumys isteýge nıettimiz. Biz bul kezdeısoq bolýy múmkin ekenin bilemiz, biraq qosymsha aqparat qajet, - dedi ol. – Mundaı qasaqana jasalǵan áreketter týraly túpkilikti qorytyndy jasaý úshin biz tolyq jáne ashyq tergeý júrgizýimiz qajet».
