Tegeranda sáýirdiń 17- 18-i kúnderi ıadrolyq qarýsyzdaný máselesine arnalǵan halyqaralyq konferentsııa ótedi
ASTANA. Sáýirdiń 13-i. QazAqparat /Aıdar Ospanalıev/ - Iran Islam Respýblıkasynyń astanasy Tegeranda sáýirdiń 17- 18-i kúnderi ıadrolyq qarýsyzdaný máselesine arnalǵan halyqaralyq konferentsııa ótedi. Bul týraly búgin jýrnalıstermen bolǵan baspasóz máslıhatynda Irannyń Qazaqstandaǵy elshisi Qurban Seıfi málim etti,
dep habarlaıdy QazAqparat.
Elshiniń sózine qaraǵanda, konferentsııa «Atom energııasy bárine - ıadrolyq qarý eshkimge emes» degen uranmen uıymdastyrylmaq. Shara negizgi 3 sessııadan turady. Olardyń birinshisi ıadrolyq qarýsyzdaný problemalary dep atalady. Ekinshisi memleketterdiń ıadrolyq qarýdan bas tartýy men ony taratýǵa tyıym salý baǵytyndaǵy halyqaralyq mindettemelerine qatysty. Úshinshi sessııa ıadrolyq qarýsyzdaný baǵytyndaǵy naqty sheshimder jóninde bolady. «Halyqaralyq jıyn barysynda jappaı qyryp- joıý qarýlaryn paıdalanýdyń saldarynan mert bolǵandarǵa arnalǵan arnaıy kórme ashylady. Jıynǵa álemniń 60 eliniń ókilderi qatysady dep kútilýde. Atalmysh elderdiń keıbiriniń Syrtqy ister mınıstrleri keledi. Sonymen qatar oǵan sarapshylar men ǵalymdar da qatysady», dedi Elshi.
