Tegeranda manıfestatsııa barysynda 4 adam qaza tapty
TEGERAN. Jeltoqsannyń 28-i. QazAqparat - Irandyq aǵylshyn tildi «Press-TV» telearnasy Tegeranda bolǵan manıfestatsııa kezinde 4 adamnyń qaza bolǵany týraly oppozıtsııanyń aqparatyn qýattady.
Telearnanyń málimetteri boıynsha, olardyń úsheýi kóshe qaqtyǵystarynyń emes, jazataıym oqıǵalardyń qurbany bolǵan, dep habarlaıdy ITAR-TASS agenttigi.
"Press-TV" telearnasynyń ırandyq quqyq qorǵaý organdaryna silteme jasap habarlaýynsha, jeksenbi kúni bolǵan kóshe sherýleri kezinde bir adam kópirden qulap, eki adam kóliktiń astyna túsip qaza tapsa, taǵy bir adam oqqa ushyp kóz jumǵan.Oq atqan adam belgisiz qalyp otyr, ol oqıǵa ornynan izin jasyryp úlgergen. Telearna sondaı-aq, qaza tapqandardyń eshqaısysy ırandyq oppozıtsııa jetekshisi Mır Hoseın Mýsaýıdiń týysy emes ekenin aıryqsha atap kórsetýde. Sebebi oppozıtsııa ókilderi buǵan deıin osyndaı aqparat taratqan bolatyn.
Keshe Tegeranda bolǵan manıfestatsııa kezinde ıran oppozıtsııasynyń jaqtaýshylary Quran kitabyn órtegen. Bul týraly Fars aqparat agenttigi habarlap otyr. Agenttik sondaı-aq, úkimetke qarsy elementterdiń birneshe qalalyq taksıdi, polıtsııa mashınalary men jekemenshik kólikterdi órtegenderin habarlady. Oǵan qosa, oppozıtsıonerler Ashýra dinı sharasyna oraı Tegerannyń ortalyq alańymen ótken sherýshilerge tas laqtyrǵan. Birneshe adam jaraqat alǵan, dep habarlaıdy Fars agenttigi.
