Tegeranda elektr energııasyn artyq tutynǵan 500-den astam mekeme jaryqsyz qaldy
ASTANA. KAZINFORM – Iran bıligi jaz mezgilinde elektr energııasyn tutynýdy baqylaýdy kúsheıtti. Tegeranda belgilengen normalardy buzǵan 500-den astam memlekettik mekeme elektr jelisinen ajyratyldy, dep habarlaıdy Anadolu.
Tegeran elektr taratý jelisi kompanııasynyń bas dırektory Mahmýd Mahmýdıdiń aıtýynsha, jaz aılarynda elektr energııasyna suranystyń artýyna baılanysty memlekettik mekemelerdiń energııa tutynýy turaqty baqylaýda.
– Tegeran men oǵan irgeles aýdandarda shamamen 4 400 memlekettik mekeme jumys isteıdi. Búgingi kúnge deıin belgilengen tutyný normalaryn ártúrli ýaqytta asyrǵan 500-den astam uıymnyń elektrmen jabdyqtalýy toqtatyldy, – dedi ol.
Onyń aıtýynsha, shekteýler energııa tutyný deńgeıi belgilengen kórsetkishterge qaıta túskenge deıin saqtalady.
Mahmýdı memlekettik mekemelerge energııa únemdeıtin jaryqtandyrý júıelerin qoldanýǵa, avtomattandyrylǵan basqarý júıelerin ornatýǵa, kondıtsıonerlerdiń temperatýrasyn 25 gradýs Tselsıı deńgeıinde ustaýǵa, jabdyqtarǵa turaqty tehnıkalyq qyzmet kórsetýge jáne ǵımarattardyń jylý oqshaýlaýyn jaqsartýǵa keńes berdi.
– Mınıstrler kabıneti sheshimine sáıkes, ystyq kúnderi memlekettik mekemeler saǵat 07:00–13:00 aralyǵynda elektr energııasyn tutynýdy keminde 30 paıyzǵa, al 13:00-den keıin jumys kúnindegi qalypty deńgeımen salystyrǵanda keminde 70 paıyzǵa qysqartýǵa mindetti, – dep eske saldy Mahmýd Mahmýdı.
Onyń aıtýynsha, belgilengen lımıtten asqan jaǵdaıda energııa tutynýdy shekteýdiń avtomatty júıesi iske qosylyp, ǵımarattyń elektrmen jabdyqtalýy birden ajyratylady.
Aıta keteıik, buǵan deıin Kýbada eki apta ishinde úshinshi ret jalpyulttyq elektr energııasynyń jappaı óshýi tirkelgen bolatyn.
