Tegeranda «Álem balalar kózimen» atty qazaqstandyq balalar sýretteriniń kórmesi ótti

NUR-SULTAN. QazAqparat - Qazaqstan Respýblıkasynyń Iran Islam Respýblıkasyndaǵy Elshiligi 2021 jyly 12 qarashada qazaqstandyq «Aıalaǵan alaqan» qoǵamdyq qaıyrymdylyq qorynyń bastamasymen jáne qoldaýymen Tegerannyń «Zárna» kórkemóner galereıasynda «Álem balalar kózimen» atty qazaqstandyq múmkindigi shekteýli balalardyń sýret kórmesin uıymdastyrdy.

Atalǵan kórmege jetekshisi Rada Haırýsheva bolyp tabylatyn múmkindikteri shekteýli balalarǵa kómek kórsetetin «Aıalaǵan alaqan» qoǵamdyq qaıyrymdylyq qory usynǵan balalardyń sýretteri qoıyldy, dep habarlaıdy QazAqparat elshiliktiń baspasóz qyzmetine silteme jasap.

Qazaqstan Respýblıkasy Táýelsizdiginiń 30 jyldyǵyna oraılastyrylǵan osy kórmeniń basty maqsaty - qıyndyqtarǵa qaramastan, osy balalardyń múmkindikteri sheksiz ekendigin, olardyń izgi oı-armanyn, ómirge degen qushtarlyǵyn ashyp kórsetý.

Kórmege qoıylǵan týyndylardy ırandyq óner, bilim qaıratkerleri, isker toptary, QR azamattary men Irandaǵy qazaq dıasporasynyń ókilderi kelip tamashalady.

Qazaqstandyq balalardyń shyǵarmashylyǵymen tanysqan zań ǵylymdarynyń doktory, professor Saııed Hasan Amın, músinshi Fateme Asadı jáne ózge de ırandyq qaıratkerler qazaqstandyq erekshe balalardyń shyǵarmashylyǵynan olardyń dúnıege ińkár kózqarastaryn anyq kórýge bolatynyn atap kórsetti.