Tegeran Tramppen ıadrolyq kelisimde ýrannan bas tartýǵa daıyn

ASTANA. KAZINFORM — Iran ekonomıkalyq sanktsııalardy alyp tastaý úshin belgili bir sharttarmen prezıdent Donald Tramppen ıadrolyq kelisimge qol qoıýǵa daıyn, dep málimdedi Irannyń joǵarǵy jetekshisiniń bas keńesshisi. 

NBC News atap ótkendeı, Irannyń rýhanı jetekshisi aıatolla Álı Hameneıdiń saıası, áskerı jáne ıadrolyq máseleler jónindegi bas keńesshisi Álı Shamhanı jalǵasyp jatqan talqylaý týraly kópshilik aldynda sóz sóılegen Irannyń eń joǵary laýazymdy tulǵalarynyń biri. 

Onyń málimdeýinshe, Iran ıadrolyq qarý óndirmeýge, joǵary baıytylǵan ýran qorynan bas tartýǵa, ýrandy tek beıbit maqsatta tómen deńgeıde baıytýǵa jáne halyqaralyq ınspektsııaǵa ruqsat berýge mindettenedi. Bul úshin AQSh Iranǵa qarsy barlyq ekonomıkalyq sanktsııalardy dereý alyp tastaýy kerek.

Shamhanı eger bul sharttar oryndalsa, Iran kelisimge qol qoıýǵa kelisetinin habarlady. 

Alı Shamhanıdiń málimdemesi Joǵarǵy Kóshbasshynyń jaqyn ortasynan Irannyń kútýleri men kelisimge daıyndyǵy týraly eń anyq jarııa málimdeme boldy. Irannyń Joǵarǵy Kóshbasshysy ulttyq qaýipsizdik máseleleri boıynsha sońǵy sheshimdi qabyldaıdy.

AQSh pen Iran Tegerannyń ıadrolyq baǵdarlamasy boıynsha birneshe aptadan beri kelissózder júrgizip jatyr. Tramptyń Taıaý Shyǵystaǵy arnaıy ókili Stıv Ýıtkoff Oman astanasy Maskattaǵy sońǵy kelissózderdi «jigerlendirerlik» dep atady. Al Irannyń syrtqy ister mınıstri Abbas Arakchı kelissózderdi «qıyn, biraq paıdaly» dep baǵalady.

Buǵan deıin AQSh Iranǵa qarsy qosymsha sanktsııalar engizgenin jazǵan bolatynbyz.