Tegerandaǵy aýyzsý tapshylyǵy: bılik evakýatsııaǵa qamdanyp jatyr

ASTANA. KAZINFORM — Tegeranda sý tapshylyǵy kúrt artyp, bılik turǵyndardy kóshirý yqtımaldyǵyna amalsyz kónip, evakýatsııaǵa qamdanyp jatyr, dep habarlaıdy BILD.

Uzaqqa sozylǵan qurǵaqshylyq saldarynan eldegi aýyzsý tapshylyǵy kúrdelene tústi. Iran prezıdenti Masýd Pezeshkıan jaýyn jaýmasa, sý tutyný normasy engizilip, tipti astanany evakýatsııalaý qajet bolýy múmkin ekenin málimdedi.

Qalaǵa aýyzsý negizinen Amır-Kabır sý qoımasynan keledi. Tegerannyń sýmen qamtý basqarmasynyń basshysy Behzad Parsynyń aıtýynsha, onda nebári 14 mln tekshe metr ǵana qalǵan — bul qoımanyń jalpy syıymdylyǵynyń 8%-y. Mundaı kólem Tegerandy eki aptadan artyq qamtamasyz ete almaıdy.

10 mln-nan astam turǵyny bar megapolıs táýligine shamamen úsh mln tekshe metr sý tutynady. Sońǵy kúnderi keı aýdandarda sý berý ýaqytsha toqtatylǵan. Buǵan deıin de jaz kezinde máseleler bolǵan.

Taıaý Shyǵys jáne jahandyq tártipti zertteý ortalyǵynyń (CMEG) taldaýynda Irandaǵy sý daǵdarysy tek sý qoımalaryn ǵana emes, qurǵap jatqan batpaqty aımaqtar men sarqylǵan jerasty kózderin de qamtıtyny kórsetilgen. Sarapshylar bıliktiń ınfraqurylymǵa ınvestıtsııa salýǵa naqty daıyndyq belgilerin baıqatpaı otyrǵanyn, sondyqtan jaǵdaı odan ári nasharlaýy múmkin ekenin aıtady.

Qujatta ekologııalyq daǵdarystar elde buryn da jappaı narazylyqtarǵa sebep bolǵany, al qazirgi sý tapshylyǵynyń saıası saldary bolýy múmkin ekeni atap ótilgen.

Iran astanasynyń basty aýyzsý kózi eki apta ishinde tolyqtaı sarqylyp qalýy múmkin ekeni buǵan deıin habarlanǵan. Oǵan eldi qyspaqqa alyp bara jatqan buryn-sońdy bolmaǵan qurǵaqshylyq sebep bolyp otyr.

Munyń aldynda Iran prezıdenti Masýd Pezeshkıan Tegerandaǵy sý máselesi kúrdeli ekenin málimdep, el astanasyndaǵy sý resýrstary men qorlarynyń azaıýy alańdatarlyq jaǵdaıda ekenin aıtqan.