Tegeran Ormýz buǵazyn ashýǵa daıyn ekenin málimdep, AQSh-qa shart qoıdy
ASTANA. KAZINFORM — Tegeran BUU Bas Assambleıasy aıasynda Vashıngtonmen aradaǵy teketiresti báseńdetýdiń bir jolyn usyndy. Bul týraly Kazinform agenttiginiń menshikti tilshisi habarlaıdy.
Iran AQSh áskerı qysymdy toqtatyp, eldiń teńiz aılaqtaryn qorshaýǵa alýdy doǵarsa, Ormýz buǵazyn jeti kún ishinde ashýǵa daıyn. Bul týraly seısenbide Irannyń joǵary laýazymdy sheneýnigi Reuters agenttigine málimdedi.
— AQSh jaǵdaıdy dıplomatııalyq jolmen retteýge nıetti ekenin resmı túrde habarlaýy kerek. Osydan keıin taraptar aldaǵy úderistiń merzimin ózara kelisip alady, — dedi agenttikke bergen suhbatynda Iran sheneýnigi.
Iran ready to reopen Strait of Hormuz if US eases military pressure and lifts blockade https://t.co/91KAA4pcfZ https://t.co/91KAA4pcfZ
— Reuters (@Reuters) September 22, 2026
Onyń aıtýynsha, Nıý-Iorkke kelgen Iran delegatsııasyna Vashıngtonmen dıplomatııalyq baılanysty qaıta jandandyrý úshin qajetti ókilettik berilgen.
Tegerannyń bul usynysy 16 qyrkúıekte deldaldar arqyly AQSh tarabyna jetkizilgen. Áskerı qımyldardy toqtatý sharttary da osy jolmen talqylanýy múmkin.
— BUU Bas Assambleıasy AQSh-qa dıplomatııalyq kelissózderge qaıta oralýǵa qolaıly múmkindik beredi. Alaıda ony qaıta bastaý úshin Vashıngton naqty qadamdar jasaýy kerek, — dedi Iran sheneýnigi.
Iran prezıdenti Masýd Pezeshkıan seısenbide BUU Bas Assambleıasynyń sessııasyna qatysý úshin Nıý-Iorkke attandy. Qazirshe onyń BUU shtab-páterinde AQSh prezıdenti Donald Tramppen kezdesýi josparlanyp otyrǵan joq.
Masýd Pezeshkıan ushar aldynda halyqaralyq alańdarda Irannyń ustanymyn qorǵaýǵa nıetti ekenin málimdedi. Buǵan deıin Nıý-Iorkke Irannyń syrtqy ister mınıstri Abbas Arakchı kelgen bolatyn. Ol BUU Bas hatshysy Antonıý Gýterrıshpen telefon arqyly sóılesip, ózge memleketterdiń ókilderimen birqatar kezdesý ótkizýdi josparlady.
Iranian Foreign Minister Abbas Araghchi walks with confidence as he arrives in New York for the 81st UN General Assembly. President Masoud Pezeshkian is also expected to join him today and address the UN on Wednesday. https://t.co/YOh8tYw9bS
— Sonam Mahajan (@AsYouNotWish) September 22, 2026
Bul dıplomatııalyq málimdemeler áskerı qımyldardyń qaıta bastalýy múmkin degen eskertýler aıtylǵan tusta jasaldy.
Jeksenbide Irannyń Ortalyq áskerı qolbasshylyǵy AQSh-tyń aımaqtaǵy birqatar eldiń qoldaýymen jańa áskerı operatsııa bastaýǵa daıyndalyp jatqany týraly aqparat alǵanyn málimdedi. Tegeran mundaı jaǵdaı oryn alsa, jaýap sharalary esh shekteýsiz júrgiziletinin eskertti.
Sonymen qatar Irannyń ıadrolyq qarýdy taratpaý týraly sharttan shyǵýǵa daıyndalyp jatqany habarlanǵan bolatyn.
Aqzat Jıenalına
