Tegeran Ormýz buǵazy arqyly ótetin kemelerge baj salyǵy men shekteýler engizdi
ASTANA. KAZINFORM – Irannyń ulttyq qaýipsizdik jáne halyqaralyq saıasat komıteti Ormýz buǵazy arqyly ótetin kemelerden baj salyǵyn alý jónindegi jospardy maquldady, dep habarlaıdy The Wall Sreet Journal.
Jańa tártipke sáıkes, AQSh-pen, Izraılmen nemese buǵan deıin Iranǵa qarsy birjaqty sanktsııalar engizgen eldermen baılanysty kemelerdiń buǵaz arqyly ótýine tyıym salynady. Baj salyǵyn ıran rıalymen tóleý talap etiledi.
Buǵan deıin AQSh pen Izraıldiń áskerı operatsııasy bastalǵannan keıin Iran buǵazdy jaýyp, kommertsııalyq kemeler birneshe ret ushqyshsyz apparattardyń shabýylyna ushyraǵan edi.
25 naýryzdan bastap buǵaz arqyly tek «dostas elderdiń» kemelerine ǵana ótýge ruqsat berildi. Olardyń qatarynda Reseı, Úndistan, Irak, Qytaı jáne Pákistan bar.
Eske salaıyq, 22 naýryzda AQSh prezıdenti Donald Tramp Iranǵa Ormýz buǵazyn ashý úshin 48 saǵat ýaqyt bergen edi. Ol eger buǵaz keme qatynasy úshin ashylmasa, AQSh qarýly kúshteri belgili bir nysandarǵa soqqy jasaıtynyn eskertken.
Álemdik munaı tutynýynyń shamamen 20 paıyzy, ıaǵnı táýligine shamamen 20 mıllıon barrel munaı ótetin Ormýz buǵazy munaı jetkizý turǵysynan strategııalyq mańyzǵa ıe. Alaıda qazirgi kezde bul buǵazdaǵy qozǵalys is júzinde toqtap qalǵan.
21 naýryzda Amerıka Qurama Shtattary 20 naýryzǵa deıin tankerlerge tıelgen Iran munaıyn satý jáne tasymaldaý operatsııalaryn júrgizýge ruqsat berdi. Tıisti sheshim Sheteldik aktıvterdi baqylaý basqarmasy jarııalaǵan bas lıtsenzııada bekitilgen.
