Tegeran mańyna áýeden jasalǵan soqqydan 19 adam qaza tapty
ASTANA. KAZINFORM -Iran aýmaǵyna áýeden jasalǵan soqqylar Tegeranǵa jaqyn Eslamshahr qalasyndaǵy turǵyn úıdi qıratyp, keminde 19 adamnyń ómirin qıdy. Qaza tapqandardyń altaýy – balalar.
Al Izraıldiń Haıfa qalasyna jasalǵan zymyran shabýyly saldarynan eki adam mert bolyp, taǵy ekeýi iz-túzsiz joǵalǵandar qatarynda, dep jazady DW.
Dúısenbi, 6 sáýir kúni jasalǵan áýe soqqysy Tegerannyń ońtústik-batysynda ornalasqan Eslamshahr qalasyndaǵy turǵyn úıdi tolyqtaı qıratty. Bul týraly ırandyq buqaralyq aqparat quraldary habarlady.
IRNA agenttiginiń málimetinshe, qaza tapqandar sany keminde 19 adamdy quraıdy, onyń ishinde alty bala bar. Ázirge dál osy nysannyń ne sebepti nysanaǵa alynǵany anyqtalǵan joq.
Bul soqqy úshin jaýapkershilikti ázirge Izraıl de, AQSh ta óz moınyna alǵan joq. Shabýyl AQSh prezıdenti Donald Tramptyń Iran buǵattaǵan Ormýz buǵazyn qaıta ashýdy talap etken málimdemesinen keıin jasalǵan. Keıin Izraıl Iran aýmaǵyna soqqy jasalǵanyn rastady.
Sondaı-aq Tegerannyń birqatar aýdanynda gazben qamtýda irkilister bolǵany habarlandy. Bul jergilikti ýnıversıtet aýmaǵyna jasalǵan soqqydan keıin bolǵan oqıǵa.
IRIB málimetine súıensek, soqqy Sharıf ýnıversıtetiniń janyndaǵy janarmaı quıý stansasyna tıgen. Sonyń saldarynan Sharıf aýdanynda gaz berý ýaqytsha toqtatylǵan.
Haıfaǵa zymyran shabýyly
Izraıl aýmaǵynda ırandyq ballıstıkalyq zymyran portty Haıfa qalasyndaǵy turǵyn úıge tústi. Soqqy saldarynan ǵımarattyń bir bóligi opyrylyp qulaǵan. Qutqarý qyzmetteri túni boıy jumys istep, 6 sáýir tańyna qaraı eń kóp zardap shekken bóliktegi bir páterden eki adamnyń qaza tapqanyn rastady. Taǵy eki adam iz-túzsiz joǵalǵandar qatarynda.
Ǵımaratty aýyr zymyran soqqysy zaqymdap, qurylystyń jartysy qıraǵan. Qalǵan bóligi óte qaýipti jaǵdaıda tur, bul izdestirý-qutqarý jumystaryn aıtarlyqtaı qıyndatyp otyr.
Haıfa strategııalyq mańyzǵa ıe qala bolǵandyqtan, Iran zymyrandarynyń jıi nysanasyna aınalady. Sonymen qatar, bul qala kórshiles Lıvan aýmaǵynda áreket etetin «Hezbolla» tobynyń zymyrandary jetetin jerde tur. Qutqarý jumystary kezinde jańa shabýyl qaýpine baılanysty dabyl jarııalanǵan, alaıda keıin ol kúshin joıdy.
6 sáýir tańynda Iran tarapynan úsh márte zymyran ushyrylǵany tirkeldi. Izraıldiń ortalyq óńirlerinde áýe dabyly jarııalandy. Zymyrandardyń basym bóligin áýe qorǵanys júıeleri joıyp, qalǵandary ashyq aýmaqtarǵa qulaǵan.
Jalpy, 5 sáýir kúni Iran Izraılge qaraı tórt ret dúrkin-dúrkin zymyran atqan. Sonyń biri eldiń ońtústigindegi Beer-Sheva qalasy mańyndaǵy iri ónerkásiptik jáne hımııalyq keshenge tıgen.
Osyǵan deıin Iran AQSh pen Izraıl nysandaryna jańa soqqylar jasaǵanyn málimdedi.
