Tegeran Izraılmen qaqtyǵys kezinde qaza tapqandarmen qoshtasty

ASTANA. KAZINFORM – Myńdaǵan ırandyq Tegeran kóshelerine taıaýdaǵy qaqtyǵys kezinde qaza tapqandarmen qoshtasýǵa shyqty, dep habarlaıdy Kazinform tilshisi.

Iran astanasynda joǵary laýazymdy áskerı sheneýnikterdi, ıadrolyq ǵalymdardy jáne beıbit turǵyndardy óltirgen Izraılmen 12 kúndik soǵysta qaza tapqandardy eske alýǵa arnalǵan ondaǵan jyldardaǵy eń iri memlekettik rásimderdiń biri bastaldy. 

Qoshtasý rásimi qaza tapqan 60 adamnyń, onyń ishinde 16 ıadrolyq ǵalym men 10 joǵary shendi qolbasshynyń qurmetine uıymdastyryldy. Olardyń arasynda Iran Qarýly Kúshteri Bas shtabynyń basshysy general Mohammad Bagerı, Islam revolıýtsııasy Saqshylar korpýsynyń qolbasshysy general Hoseın Salamı jáne SІQK Aeroǵarysh kúshteriniń basshysy general Amır Álı Hadjızade bar. Úsheýi de qaqtyǵystyń alǵashqy kúnderinde, ıaǵnı 13 maýsymda Izraıl áýe kúshteriniń soqqysynan qaza tapty. 

Qara kıim kıgen myńdaǵan adam Tegerannyń ortalyq kóshelerinde kezekke turdy. Jalaýlar men marqumdardyń portretteri bar adamdar baǵanalary Engelab alańynan Azadıge deıingi dańǵyldardy toltyrdy. 

Jerleý rásimine Iran saıasaty men qorǵanys salasynyń mańyzdy tulǵalary qatysýda. Islam respýblıkasynyń prezıdenti Masýd Pezeshkıandy kúzetshilerdiń súıemeldeýimen jınalǵan jurttyń arasynan baıqady. Іs-sharaǵa sonymen qatar elıtalyq «Quds» kúshteriniń qolbasshysy Ismaıl Kaanı jáne buryn qatelesip óldi dep jarııalanǵan Joǵarǵy kóshbasshy Álı Hameneıdiń keńesshisi Álı Shamhanı qatysyp jatyr.  

President @drpezeshkian attends the funeral procession for victims of Israeli strikes in Tehran. pic.twitter.com/9ExnQ5ShQI

— IRNA News Agency (@IrnaEnglish) June 28, 2025

Óz kezeginde Iran Syrtqy ister mınıstri Abbas Arahchı ırandyqtardyń erjúrek minezine, batyl áreketterine tánti bolǵanyn jetkizdi. 

— Irandyqtar qan berdi, biraq namysty emes. Olar otbasylarynan aıyryldy, biraq qadir-qasıetinen aıyrylǵan joq. Olar eshqashan berilmedi, - dedi Iran Syrtqy ister mınıstri. 

Keıin ol óziniń Instagram paraqshasynda general Salamıdiń tabytynyń qasynda turǵan sýretin jarııalady.  

— Ulttyq maqtanysh — eń qymbat nárse. Búgingi tańda eki ıadrolyq derjavamen betpe-bet kele jatqan ırandyqtar ózderiniń abyroıyn saqtap qaldy jáne endi bolashaqqa asqan tabandylyq pen abyroımen qaraıdy, - dedi ol. 

Engelab alańyndaǵy rásimnen keıin jerleý sherýi qala ortalyǵynan shamamen 11 shaqyrym jerde ornalasqan Azadı alańyna deıin jalǵasty. Buqaralyq aqparat quraldarynyń habarlaýynsha, marqumdardyń bir bóligi Tegeranda jerlense, qalǵandary týǵan provıntsııalarynda jerlenedi. 

Memlekettik organdar mundaı aýqymdy rásimdi ótkizýdi syrtqy qaýip-qater jaǵdaıynda qoǵamnyń birligi men bıliktiń zańdylyǵyn rastaý sımvoly retinde qarastyrady. 

Keıingi onjyldyqtarda Iran ólgendermen mundaı jappaı qoshtasýdy kórmegen. Baqylaýshylardyń aıtýynsha, osyndaı aýqymdaǵy aza tutý sharalary tek Iran-Irak soǵysy kezinde ǵana ótkizilgen.

Eske salsaq, buǵan deıin Izraıl Iranǵa soqqy berip, áýe keńistigin jaýyp tastaǵan edi. AQSh Memlekettik hatshysy Izraıldiń Iranǵa qarsy jasaǵan soqqylaryn «birjaqty áreket» dep atap, oǵan Aq úıdiń qatysy joq ekenin málimdedi.

Sondaı-aq buǵan deıin Tramptyń Izraıl men Irandy aıyptaǵanyn jazǵan bolatynbyz.