Tegeran eki apta ishinde aýyzsýsyz qalýy múmkin

ASTANA. KAZINFORM – Iran astanasynyń turǵyndaryn aýyzsýmen qamtamasyz etetin negizgi sý kózi eki apta ishinde tartylyp qalýy yqtımal. Buǵan eldi jaılaǵan qurǵaqshylyq sebep bolyp otyr, dep habarlaıdy Kazinform menshikti tilshisi. 

— Tegerandy aýyzsýmen qamtamasyz etetin bes sý qoımasynyń biri Amır Kabır sý qoımasy qazirgi ýaqytta nebári 8 paıyzǵa ǵana (14 mıllıon tekshe metr sý) toly. Bir jyl buryn onyń kólemi 86 mıllıon tekshe metrge jetken edi. Biraq sodan beri bul aımaqta jaýyn-shashyn mólsheri 100 paıyzǵa qysqardy, — dep jazady Al Jazeera Tegeran sý júıesin basqarý kompanııasynyń basshysyna silteme jasap.

Onyń aıtýynsha, qazirgi deńgeıde bul sý qoımasy Iran astanasyn tek eki apta kóleminde ǵana aýyzsýmen qamtamasyz ete alady. Irandyq BAQ-tyń derekterine sáıkes, Tegeran turǵyndary táýligine shamamen úsh mıllıon tekshe metr sý tutynady.

Jaǵdaıdy turaqtandyrý sharasy retinde keıbir aýdandarǵa sý berý toqtatylǵan.

Al Jazeera málimetinshe, Iran sońǵy ondaǵan jyldaǵy eń aýyr qurǵaqshylyqtyń birine tap bolǵan.

Buǵan deıin Iran prezıdenti Masýd Pezeshkıan Tegeranda sý tapshylyǵynyń kúrdeli jaǵdaıy týraly habarlaǵan bolatyn.

Irandyq buqaralyq aqparat quraldarynyń jetekshilerimen kezdesýde memleket basshysy bılik tarapynan qabyldanyp jatqan sharalar týraly aıtty. Atap aıtqanda, ol Talekan sý qoımasynan Tegeranǵa sý jetkizý jobasy iske asyrylyp jatqanyn, bul qadam kúzgi kezeńde provıntsııany sýmen qamtamasyz etýge múmkindik beretinin atap ótti.