Tegeran AQSh-tyń Irandaǵy narazylyqtarǵa qatysty málimdemesine jaýap qatty
ASTANA. KAZINFORM — Iranda jalǵasyp jatqan ekonomıkalyq narazylyqtar aıasynda eldiń resmı ókilderi AQSh-qa qatań eskertý jasap, kez kelgen syrtqy aralasý ulttyq qaýipsizdikke tóngen qaýip retinde baǵalanatynyn málimdedi. Bul týraly Kazinform menshikti tilshisi habarlaıdy.
Irannyń rýhanı kóshbasshysynyń ulttyq qaýipsizdik máseleleri jónindegi keńesshisi Álı Shamhanı juma kúni Iran Islam Respýblıkasynyń qaýipsizdigi «qyzyl syzyq» ekenin aıtyp, qandaı da bir syltaýmen jasalatyn kez kelgen aralasýǵa qatań jaýap qaıtarylatynyn málimdedi.
Bul málimdeme AQSh prezıdenti Donald Tramptyń Amerıka Qurama Shtattary Irandaǵy narazylyq bildirýshilerdi qoldaýy múmkin degen sózine jaýap retinde jasalǵan.
Shamhanı X áleýmettik jelisindegi jazbasynda Irannyń qaýipsizdigine qandaı da bir sebeppen qol suqpaq bolǵan kez kelgen áreket maqsatyna jetpeı jatyp toqtatylatynyn atap ótti.
Ol sondaı-aq Iran halqy AQSh-tyń «qutqarý» áreketteriniń saldaryn jaqsy biletinin aıtty. Onyń sózinshe, Irak pen Aýǵanstannan bastap Gaza sektoryna deıingi mysaldar mundaı aralasýlardyń óńirde turaqsyzdyq pen beıbereketsizdikke alyp keletinin kórsetken.
Iran basshylyǵynyń ózge ókilderi de osyǵan uqsas málimdemeler jasady. Irannyń Ulttyq qaýipsizdik jónindegi joǵary keńesiniń hatshysy Álı Larıdjanı AQSh pen Izraıldi eldegi narazylyqtardy órshitýge aıdap saldy dep aıyptady. Onyń aıtýynsha, Irannyń ishki isterine aralasý Vashıngtonnyń Taıaý Shyǵystaǵy múddelerine nuqsan keltirýi múmkin.
Larıdjanı AQSh-tyń Irannyń ishki máselelerine aralasýy búkil óńirde turaqsyzdyq týǵyzyp, amerıkalyq múddelerdiń kúıreýine ákeletinin atap ótti.
Al Iran Syrtqy ister mınıstrliginiń resmı ókili Esmaıl Bagaı ıran halqy el ishindegi máselelerdi sheshý protsesine qandaı da bir sheteldik aralasýǵa jol bermeıtinin málimdedi.
Ol 1953 jylǵy tóńkeristi, Iran-Irak soǵysy kezinde Irakty qoldaýdy, 1988 jyly ırandyq jolaýshylar ushaǵynyń atyp túsirilýin, sondaı-aq sanktsııalyq qysym men 2025 jyly Iran ınfraqurylymyna jasalǵan soqqylardy eske sala otyryp, mundaı áreketterdi halyqaralyq quqyqtyń óreskel buzylýy dep atady.
Irandaǵy ekonomıkalyq narazylyqtar birneshe kúnnen beri jalǵasyp keledi. Olar eń aldymen ulttyq valıýtanyń kúrt qunsyzdanýy men baǵanyń ósýine baılanysty týyndaǵan. El bıligi dıalogqa daıyn ekenin málimdegenimen, syrtqy qysym men ishki isterge aralasýdyń jol berilmeıtinin qatań eskertip otyr.