Tedjonda Qazaqstannyń Qurmetti konsýldyǵy ashyldy
ASTANA. KAZINFORM — Qazaqstan Respýblıkasynyń Koreıa Respýblıkasyndaǵy elshisi Áset Isenalı Tedjon qalasynda Qazaqstan Respýblıkasynyń Qurmetti konsýldyǵynyń ashylý saltanatyna qatysty, dep habarlaıdy QR SІM baspasóz qyzmeti.
Qazaqstannyń Qurmetti konsýly bolyp ońtústikkoreıalyq CONTEC ǵarysh kompanııasynyń negizin qalaýshy ári basshysy, doktor Lı Son Hı (Lee Sunghee) taǵaıyndaldy.
Qazaqstandyq dıplomat Qurmetti konsýldyqtyń ashylýy Prezıdent Qasym-Jomart Toqaevtyń Koreıa Respýblıkasyna jýyrda jasaǵan memlekettik saparynyń qorytyndylary aıasynda erekshe mańyzǵa ıe ekenin atap ótti. Sapar nátıjesinde ekijaqty qatynastar «Bolashaqqa baǵdarlanǵan jan-jaqty strategııalyq áriptestik» deńgeıine kóterildi.
Áset Isenalı joǵary deńgeıde qol jetkizilgen ýaǵdalastyqtardan keıin Qazaqstan tarapynyń negizgi nazary olardy júzege asyrýǵa — jańa koreı ınvestıtsııalary men tehnologııalaryn tartýǵa, ónerkásiptik kooperatsııany, ǵylym men ınnovatsııalardy damytýǵa, sondaı-aq eki eldiń isker toptary arasyndaǵy tikeleı baılanystardy keńeıtýge baǵyttalǵanyn atap ótti.
Osy oraıda Qurmetti konsýldyq ekonomıkalyq jáne tehnologııalyq yntymaqtastyqty ilgeriletýdiń, qazaqstandyq jáne koreı kompanııalaryna qoldaý kórsetýdiń, jańa iskerlik baılanystar ornatýdyń jáne birlesken jobalardy iske asyrýdyń qosymsha praktıkalyq tetigine aınalýǵa tıis.
Kezdesý barysynda ǵarysh salasy men spýtnıktik tehnologııalar baǵytyndaǵy ózara is-qımyldy damytýǵa erekshe nazar aýdaryldy. Lı Son Hı uzaq jyldar boıy Koreıa aeroǵaryshtyq zertteýler ınstıtýtynda (KARI) zertteýshi bolyp jumys istep, 2015 jyly spýtnıktik júıelerge, jerústi ınfraqurylymyna, spýtnıktik derekterdi óńdeýge jáne ózge de ǵaryshtyq tehnologııalarǵa mamandanǵan CONTEC kompanııasyn qurdy.
CONTEC qazaqstandyq Ghalam kompanııasymen spýtnıktik tehnologııalar jáne Jerdi qashyqtan zondtaý salalarynda ózara is-qımyldy damytýda. Taraptar osy jumysty odan ári keńeıtýge járdemdesýge jáne tehnologııalyq áriptestiktiń jańa baǵyttaryn qarastyrýǵa kelisti.
— Qurmetti konsýldyq — jaı ǵana jańa keńse emes. Ol adamdardy, bıznesti, ınstıtýttar men jańa ıdeıalardy baılanystyratyn, elderimiz arasyndaǵy naqty yntymaqtastyq kópirine aınalýǵa tıis. Búgingi mindetimiz — Qazaqstan men Koreıa arasyndaǵy qatynastarǵa berilgen jańa serpindi naqty jobalar men nátıjelerge ulastyrý, — dedi Isenalı.
Elshilik pen Qurmetti konsýldyq tyǵyz jumys baılanysyn saqtaýǵa, ınvestıtsııalyq jáne tehnologııalyq jobalardy birlesip ilgeriletýge, sondaı-aq jańa koreı kompanııalarynyń Qazaqstan naryǵyna shyǵýyna járdemdesýge ýaǵdalasty.
Budan buryn Marrakeshte Qazaqstannyń Qurmetti konsýldyǵy ashylǵanyn jazǵanbyz.
