Tech girls: Qyz-kelinshekter IT-baǵyty boıynsha tegin bilim ala alady
ASTANA. KAZINFORM – 16 men 23 jas aralyǵyndaǵy qyzdarǵa arnalǵan Tech girls baǵdarlamasy iske qosyldy. Qatysýǵa ótinishter 1 naýryzǵa deıin qabyldanady.
Eki aıǵa sozylatyn Tech Girls baǵdarlamasy eldiń barlyq aımaqtaryn qamtıdy. 3 myńnan astam qyz-kelinshek IT-baǵyttar boıynsha tegin oqý múmkindigine ıe bolady. Bilim berý barysynda vebınarlar, vorkshoptar, tikeleı efırler, sondaı-aq Techno Women jáne Astana Hub sarapshylary men tálimgerlerimen sessııalar qarastyrylǵan.
«Tech Girls baǵdarlamasynyń qatysýshylary IT-ónimderdi tez jáne tıimdi qurýǵa múmkindik beretin biregeı daǵdylarǵa ıe bolady. Mysaly, No Code School lendıngter, saıttar, mobıldi qosymshalar, chat-bottar jáne marketpleıster qurý negizderin úıretedi. Low Code baǵdarlamalaýdyń mınımaldy daǵdylary bar qosymshalardy ázirlegisi keletinderge jaramdy, al Beta Career kýrsy bedeldi IT-kompanııalarda mansaptyq konsaltıng jáne kásibı baǵdarlamalaý salasyndaǵy tájirıbeli mamandardan áńgimelesýden sátti ótý úshin qajetti bilim men daǵdylardy usynady», — dedi Astana Hub basqarýshy dırektory Danııa Ahmetova.
Mundaı baǵdarlamalardyń mańyzdylyǵyna 2023 jyly júzege asqan IT—Aiel baǵdarlamasynyń tabysty tájirıbesi dálel bola alady. Atalǵan baǵdarlamanyń arqasynda Qazaqstannyń 17 óńirinen 2000-nan astam jumyssyz áıelge Aqparattyq tehnologııalar salasyndaǵy mamandyqtar boıynsha tegin bilim alýǵa múmkindik berildi. Bıyl da IT—Aiel baǵdarlamasy óz jalǵasyn tabady dep kútilip otyr.
«Tech Girls — bul jas qyzdardyń Aqparattyq tehnologııalar salasyndaǵy áleýetin ashýǵa zor múmkindik beretin baǵdarlama. Bizdiń maqsatymyz — jas urpaqty IT salasynda tabysty mansapqa qajetti daǵdylarmen qamtamasyz etý arqyly qoldaý. Bul tek talanttardy damytýǵa ǵana emes, Qazaqstannyń tsıfrlyq ekonomıkasynyń bolashaǵyna da ınvestıtsııa», - dep atap ótti QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi Alına Abdrahmanova.
