Teatrlarymyz zamanǵa saı túlep, jandanyp kele jatyr – Dáýren Abaev
«Áli esimde, 14-ke tolǵanda ákem Áýezov teatryna aparyp, «Biz perishte emespiz» degen spektakldi kórsetken. Aýyl klýbynan úlken sahnany alǵash kórgen men úshin teatrdyń ózine tán aýrasy, qalyptasqan tártibi, kórermen zaly, akterlerdiń oıyny umytylmas áser qaldyrǵan edi. Stýdenttik jyldary jıi baryp turǵanymyzben, qyzmetke aralasyp, elordaǵa qonys aýdarǵannan keıin Áýezov teatryna jol túspeı qoıyp edi, sonyń oraıy jaqynda keldi. Almatyǵa jasaǵan jumys saparymyzda qara shańyraqqa arnaıy baryp, «Qan men ter. Aqbala» spektaklin tamashaladyq. Sonymen birge Músirepov teatryna da baryp, «Qaragóz» qoıylymyn kórdik. Spektaklder óte unady. Biraz oı túıip, tushynyp qaıttyq», - dep jazdy Dáýren Abaev Facebook paraqshasynda.
Sondaı-aq, mınıstr F.Moldaǵalı jáne A.Ospanbaeva sııaqty jas rejısserlerdiń M.Áýezov jáne Á.Nurpeıisov syndy klassık jazýshylardyń shyǵarmalaryn jańasha keıipte sahnalap jatqanyn atap ótti.
«Jyl ótken saıyn teatrlarymyz zamanǵa saı túlep, jańaryp, jandanyp kele jatqany daýsyz. Akterlerdiń sheberligine, sahnaǵa, kórermen talǵamyna qarap-aq, elimizdegi mádenıet salasynyń damý qarqynyn baıqaýǵa bolady. Sonymen birge, otandyq óner ıeleriniń sheteldik áriptesterimen sheberlik turǵysynan deńgeılestigi, keıde, tipti, ózindik erekshelikteriniń arqasynda ozyq turatyny da aıqyn baıqalady. Birneshe memlekette jumys istep, ózge elderdiń de mádenıet oshaqtaryn kórgen adam retinde bulaı tolyq senimmen aıta alamyn», - deıdi ol.
