Teatrlarǵa qyzyǵýshylyq artyp keledi: kórermen sany 2,8 mıllıonnan asty
ASTANA. KAZINFORM — Elimizdegi teatrlar kórermenge 16 myńnan astam qoıylym usyndy, dep habarlaıdy Mádenıet jáne aqparat mınıstrliginiń baspasóz qyzmeti.
Qazaqstannyń memlekettik teatrlary repertýaryn tolyqtyryp, jańa qoıylymdardy kórermen nazaryna usynyp keledi. Bıylǵy teatr maýsymynda elimizdiń sahnalarynda drama, opera, balet, mýzykalyq komedııa, balalar men jasóspirimderge arnalǵan spektaklderdi qamtyǵan júzdegen premera ótti.
Memleket basshysy Qasym-Jomart Toqaev mádenıet pen ónerdi damytýǵa, ulttyq bolmysty nyǵaıtýǵa jáne shyǵarmashylyq ujymdardy qoldaýǵa basymdyq beredi. Sonyń nátıjesinde Maksım Gorkıı atyndaǵy Memlekettik akademııalyq orys drama teatryna «Ulttyq» mártebe berý, al Soltústik Qazaqstan oblystyq Sábıt Muqanov atyndaǵy qazaq sazdy-drama teatryna «Akademııalyq» mártebe berý jóninde sheshim qabyldandy.
Teatrlardyń mártebesin arttyrýmen qatar, mádenı ınfraqurylymdy jańǵyrtý jumystary da jalǵasyp jatyr. Atap aıtqanda, Muhtar Áýezov atyndaǵy Qazaq ulttyq drama teatry men Natalııa Sats atyndaǵy orys memlekettik akademııalyq balalar men jasóspirimder teatry ǵımarattaryn qaıta jańǵyrtý jumystary júrgizilip jatyr.
— Búginde elimizde opera, balet, drama, mýzykalyq komedııa, qýyrshaq, balalar jáne jasóspirimder teatrlaryn qosa alǵanda, túrli baǵyttaǵy 59 memlekettik teatr jumys isteıdi. Teatr salasynda 8,1 myńnan astam adam eńbek etedi. Maýsym bastalǵaly memlekettik teatrlarda 16 myńnan astam spektakl men mádenı baǵdarlama kórsetildi. Olardy 2 832 835 kórermen tamashalady. 410 jańa qoıylym men baǵdarlama sahnalandy. Maýsymnyń eleýli premeralary qatarynda «Astana Opera» teatryndaǵy «Qypshaq qyzy Appaq» operasy, Abaı atyndaǵy Qazaq ulttyq opera jáne balet teatryndaǵy «Han Sultan. Altyn Orda» operasy, sondaı-aq «Astana Balet» teatryndaǵy «Carmina Burana» baleti men «Qarlyǵash», «Bolero H» horeografııalyq mınıatıýralary bar, — delingen habarlamada.
Jańa qoıylymdar drama jáne mýzykalyq komedııa teatrlarynda da sahnalandy. Ǵabıt Músirepov atyndaǵy Memlekettik akademııalyq balalar men jasóspirimder teatrynda «Gamlet» pen «Qorǵansyz» spektaklderiniń premerasy ótti. Quddys Qojamııarov atyndaǵy Respýblıkalyq memlekettik akademııalyq uıǵyr mýzykalyq komedııa teatrynda «Revızor», Mıhaıl Lermontov atyndaǵy Ulttyq orys drama teatrynda «Jenıtba», al Respýblıkalyq memlekettik akademııalyq koreı mýzykalyq komedııa teatrynda «Mahabbat bárin jeńedi» qoıylymdary kórermenge jol tartty.
Maýsym aıaqtalǵanǵa deıin de birqatar jańa premera usynylady. 26 maýsymda «Astana Balet» teatry «Altyn gúl» baletin sahnalasa, 27 maýsymda Qalıbek Qýanyshbaev atyndaǵy Qazaq ulttyq mýzykalyq drama teatrynda Ábdijámil Nurpeıisovtiń shyǵarmasy negizinde qoıylǵan «Qan men ter» spektakliniń premerasy ótedi.
