«Teatrlar jáne teatr qyzmeti týraly» zań jobasyn ázirleýdiń mańyzdylyǵy aıtyldy
ASTANA. 19 maýsym. QazAqparat - Búgin Májiliste «Búgingi Qazaqstannyń teatry: teatr qyzmetiniń qazirgi jaǵdaıy jáne ony zańnamalyq turǵydan jetildirýdiń perspektıvalary» taqyrybynda dóńgelek ústel ótti.
Bul sharany QR Parlamenti Májilisiniń Áleýmettik-mádenı damý komıteti jáne Qazaqstan halqy Assambleıasynyń depýtattyq toby uıymdastyrdy.
QR Parlamenti Májilisi Áleýmettik-mádenı damý komıtetiniń tóraıymy Darıǵa Nazarbaeva kirispe sóz sóılep, jańa zań jobasyn ázirleý úshin jáne zańǵa bastamashylyq jasaý úshin búgingi basqosýdyń mańyzdylyǵy óte zor ekenin aıtty. «Sizderdiń pikirlerińiz ben kózqarastaryńyzdy bilý úshin keń aýqymda kezdesip turǵanymyz jón. Biz osy qyzmet salasynyń naqty zańmen rettelýi qajet dep esepteımiz», - dedi.
Dóńgelek ústelde QR Mádenıet jáne aqparat mınıstriniń orynbasary Asqar Bóribaev sóz sóılep, Qazaqstandaǵy teatrlardyń jaı-kúıi týraly baıandap berdi.
Dóńgelek ústel jumysyna Parlament depýtattary, memlekettik organdardyń, respýblıkalyq, oblystyq jáne ulttyq teatrlardyń basshylary, belgili synshy-teatrtanýshylar men dramatýrgter, azamattyq qoǵam ınstıtýttary men BAQ ókilderi qatysty.
QR Teatr qaıratkerleri odaǵynyń tóraǵasy Tuńǵyshbaı Jamanqulov, Qazaqstandaǵy Jazýshylar odaǵy dramatýrgııa keńesiniń meńgerýshisi Sultanáli Balǵabaev, jazýshy-dramatýrg, QR Memlekettik syılyǵynyń laýreaty Dýlat Isabekov, jazýshy, QR Memlekettik syılyǵynyń laýreaty Ákim Tarazı, Qaraǵandy akademııalyq mýzykalyq komedııa teatrynyń dırektory Amantaı Ibraev, M. Áýezov atyndaǵy Qazaq memlekettik akademııalyq drama teatrynyń dırektory - kórkemdik jetekshisi Esmuhan Obaev, M. Lermontov atyndaǵy memlekettik akademııalyq orys drama teatrynyń kórkemdik jetekshisi Rýben Andrıasıan jáne osy teatrdyń bas dırektory ıÝrıı ıAkýshev, Q.Qojamıarov atyndaǵy memlekettik respýblıkalyq uıǵyr mýzykalyq komedııa teatrynyń kórkem jetekshisi Ahmetjan Qadyrovtar sóz sóılep, teatrlardyń búgingi ózekti máselelerin ortaǵa saldy. El mádenıetin damytý úshin teatrlardyń qyzmetin retteýge baǵyttalǵan zań qajet ekeni aıtyldy.
Atalǵan is-sharanyń maqsaty - búgingi tańda qazaqstandyq teatrlar aldynda turǵan problemalardy sheshýdiń joldaryn tabýǵa kómek kórsetý úshin teatr ónerin zańnamalyq turǵydan qamtamasyz etýdi jáne damytý perspektıvalaryn talqylaý.
Dóńgelek ústeldiń qorytyndysynda teatr jumysyna qoldaý kórsetý jóninde usynymdar qabyldaý, sondaı-aq «Teatrlar jáne teatr qyzmeti týraly» zań jobasyn ázirleýdiń oryndylyǵyn talqylaý týraly ortaq toqtam jasaldy.
