Teatrlar gastroli, Open-air men Qabatovtyń keshi: Almatydaǵy Astana kúnderiniń sharalary

Elordanyń Mádenıet jáne sport basqarmasynan habarlanǵandaı, Astananyń Almatydaǵy kúnderi aıasyndaǵy eń iri joba Qaırat Baekenov pen «Format» tobynyń Open-Air jeke kontserti bolady. Shara senbi, 22 qyrkúıek kúni «Astana» qalalyq alańynda ashyq aspan astynda ótedi. Bastalýy saǵat - 19:00.

Sonymen qatar, Tursynbek Qabatovtyń ázil-syqaq keshi men elordalyq shyǵarmashylyq ujymdardyń jáne tanymal estrada oryndaýshylarynyń qatysýymen ótetin Gala-kontsert kórermenderge kóterińki kóńil-kúı syılamaq.

Tursynbek Qabatovtyń satıra keshi 20 qyrkúıekte saǵat 19.00-de Respýblıka saraıynda ótedi. Qazaqstandyqtardyń súıikti ázilkeshi Almaty turǵyndary men qonaqtary úshin arnaıy «Ázil álemi» baǵdarlamasyn ázirlegen.

Kelesi kúni osy ýaqytta Respýblıka saraıynda kelýshiler Gala-kontsert tamashalaıdy. Kontsert shymyldyǵy professor Aıtqalı Jaıymov jetekshilik etken Astana qalasynyń Memlekettik akademııalyq fılarmonııasynyń qazaq orkestriniń oryndaýyndaǵy Qurmanǵazynyń «Saryarqa» kúıimen ashylady. Baǵdarlamada - «Shalqyma» halyq bıi ansambli, estradalyq bı ansambli, klassıkalyq, estradalyq jáne halyq vokaly solısteri, sondaı-aq, estrada artısteri óner kórsetedi. Keshke Seken Turysbek, Altynaı Jorabaeva, Tamara Asar, Medet Salyqov, Klara Tólenbaeva, Almas Kishkenbaev, Marjan Arapbaeva, Qaırat Baekenov jáne «Format» toby, Dos, Rınat Maltsagov syndy oryndaýshylar, «Art dombyra» jobasy jáne t.b. qatysady. Al Tursynbek Qabatovtyń ázil-qaljyńy kórermenderge rııasyz kúlki syılaıdy.

Elordalyq fılarmonııa orkestrleri men solısteriniń oryndaýyndaǵy klassıkalyq áýenderdi tyńdaıdy, elimizdiń talantty sýretshileriniń eńbekterimen etene tanysyp, otandyq estrada oryndaýshylarymen kezdesedi.

Táýelsizdik saraıynyń ujymy qyrkúıektiń 19-21 aralyǵynda Almaty turǵyndary men qonaqtaryn barsha Qazaqstandy aralap, myńdaǵan adamdy tánti etken «Aq tilekpen, Astana!» kórmesine shaqyrady. Ekspozıtsııada elimizdiń 50-den asa sýretshisiniń júzge jýyq jumysy usynylady. Bul eńbekterde táýelsiz memleketimizdiń tarıhynyń árbir kezeńi qamtylǵan. Kórme Respýblıka saraıynda saǵat 10.00-18.00 aralyǵynda ótedi.

19-25 qyrkúıek aralyǵynda ótetin gastroldik sapar barysynda almatylyqtar Astana qalasy teatrlarynyń úzdik qoıylymdaryna óz baǵasyn beretin bolady. M. Gorkıı atyndaǵy memlekettik akademııalyq orys drama teatry eki spektakl - B.Jandarbekovtyń «Tomırıs - tsarıtsa sakskaıa» epıkalyq dramasyn jáne A.Pýshkınniń «Evgenıı Onegın» romanynan úzindiler qoıady.

21 qyrkúıekte keshke N.Sats atyndaǵy balalar men jasóspirimder memlekettik akademııalyq orys drama teatrynda kórermender tarıhymyzdaǵy eń ataqty shaıqas - saqtar men áıgili Parsy patshasy Kırdiń arasyndaǵy urysty kóre alady. Qazaq handyǵynyń 550 jyldyǵyna arnalǵan qoıylymda patshaıym Tomırıs, názik ári qaısar minezdi áıel, ana, óz halqyn qutqarý jáne onyń bostandyǵy úshin bárine de daıyn jaýynger týraly áńgimelenedi. Dramanyń qoıýshy-rejısseri - QR eńbek sińirgen qaıratkeri, «Tarlan» syılyǵynyń laýreaty Gýlsına Mergalıeva, qoıýshy-sýretshi - QR Mádenıet qaıratkeri Qanat Maqsutov.

Kelesi kúni osy sahnada jáne osy ýaqytta elordalyq Orys drama teatrynyń artısteri Evgenıı Onegındi sahnalaıdy. Qoıylymdaǵy keıipker Pýshkınniń kezinde emes, qazirgi zamanda ómir súredi. Aıta keteıik, spektakl RF Teatr qyzmetkerleri odaǵynyń qoldaýymen qoıylyp, Almatydaǵy V «Otkrovenıe» halyqaralyq oryndaý óneri festıvaliniń jáne Sankt-Peterbýrgtegi «Vstrechı v Rossıı» TMD jáne Baltyq memleketteriniń HH halyqaralyq teatr festıvaliniń laýreaty bolyp tabylady.

Jastar teatrynyń akterleri 22 jáne 23 qyrkúıekte M.O.Áýezov atyndaǵy Qazaq memlekettik akademııalyq drama teatrynyń sahnasynda M.Levıdiń «Mejdý nebom ı zemleı» jáne «Motsart» mıýzıklin kórsetedi.

Sonymen birge, almatylyqtar Q.Qýanyshbaev atyndaǵy memlekettik akademııalyq qazaq mýzykalyq-drama teatrynyń úsh qoıylymyn tamashalaıdy. 24-25 qyrkúıekte elordalyq akterler M.Áýezovtyń «Qarash- qarash» áleýmettik dramasyn, Ý.Shekspırdiń «Otello» tragedııasyn jáne «Shıe» pesasyn qoıady.

«Qarash-qarash» spektakliniń qoıýshy-rejısseri Qazaqstan Respýblıkasynyń eńbek sińirgen qaıratkeri Álimbek Orazbekov, qoıýshy-sýretshi - Qyrǵyzstannyń eńbek sińirgen qaıratkeri - ıÝldash Nýrmatov. Dramada Jarasbaı men Baqtyǵuldyń dostyqqa jáne Týǵan jerge degen súıispenshiligi jaıly aıtylady. Olar birge bolsa, ata-babadan qalǵan jerdi saqtap, ony keńeıte alady. Al adal joldan taısa, opasyzdyqqa tap bolady...

Sonymen qatar, «Otello» tragedııasy QR halyq artısi, «Qallekı» teatrynyń kórkemdik jetekshisi Talǵat Temenovtyń ınterpretatsııasynda usynylady. Spektakldegi urysty reseılik ekspert, sahnalyq urystar sheberi Mıhaıl Vıshnevskıı qoıǵan.

23-24 qyrkúıekte Astananyń Qýyrshaq teatrynyń úzdik týyndylarynyń biri - R.Muqanovanyń «Máńgilik bala beıne» atty spektakli almatylyq kórermenge jol tartady. Teatrdyń kórkemdik jetekshisi, QR eńbek sińirgen artısi Quralaı Eshmuratovanyń qoıylymynda Semeı polıgonynda oryn alǵan oqıǵalar men onyń saldary jaıly áńgimelenedi. Spektakldi Almaty qalasynyń Memlekettik qýyrshaq teatrynda tamashalaýǵa bolady.

Sonymen qatar, 22 qyrkúıekte saǵat 14.00-de Panfılov-Jibek joly kóshelerindegi Jazǵy sahnada elordalyq Qýyrshaq teatrynyń artısteri «Baıqa jolda, balaqaı!» qoıylymyn kórsetedi.

Budan basqa, elordalyq Memlekettik akademııalyq fılarmonııanyń shyǵarmashylyq ujymdary da keremet kontsertter ótkizedi. 22 qyrkúıekte Qurmanǵazy atyndaǵy Qazaq ulttyq konservatorııasynyń Organ zalynda Ǵ.Jubanova atyndaǵy ishekti aspaptar kvarteti «Uly dala áýenderi» baǵdarlamasymen óner kórsetedi. Shyǵarmashylyq keshte Shýbert, Gaıdn, Borodın, Jubanov, Jaıymov, Mahambet, Jeldibaeva, Táttimbet jáne Qurmanǵazy syndy uly tulǵalardyń týyndylary oryndalady. Kontserttiń bastalýy saǵat 18.00-de. Jambyl atyndaǵy Qazaq memlekettik fılarmonııasynda elordalyq fılarmonııanyń Qazaq orkestri «Elordadan elge sálem» atty kontserttik baǵdarlamasyn usynady.

22 qyrkúıekte saǵat 16.00-de Panfılov-Jibek joly kóshelerindegi Jazǵy sahnada ótetin «Astanadan aq tilek» kontsertinde almatylyqtar elordalyq artısterdiń jumysyna jáne repertýaryna laıyqty baǵasyn bere alady.

Sport súıer qaýym da merekelik sharalardan tys qalmaıdy. Astananyń mádenı kúnderi aıasynda 23 qyrkúıekte saǵat 14:00-de Almaty ortalyq stadıonynda fýtboldyń damýyna úles qosqan ardagerler arasynda týrnır ótedi.

Almatyda ótetin sharalar Astananyń 20 jyldyǵyna oraı elordalyq shyǵarmashylyq ujymdar Qazaqstannyń óńirlerinde uıymdastyrǵan merekelik baǵdarlamanyń shymyldyǵyn jabady.