Teatrlar basshylary T.Jamanqulov jetekshilik etetin Odaqtan jappaı shyǵyp ketti
ASTANA. QazAqparat - Elimizde «Qazaqstan teatrlary qaýymdastyǵy» jańa qoǵamdyq birlestigi quryldy. Bul týraly QR Mádenıet jáne sport mınıstrliginiń baspasóz qyzmetinen málim etti.
Assotsıatsııanyń prezıdenti bolyp M.Áýezov atyndaǵy Qazaq memlekettik akademııalyq drama teatrynyń kórkemdik jetekshisi, KSRO Halyq ártisi, memlekettik júldelerdiń laýreaty, «M. Lomonosov» ordeniniń kavaleri, «Otan» jáne «Dostyq» ordenderiniń ıegeri Asanáli Áshimov saılandy, dep habarlaıdy QazAqparat.
Jańa qaýymdastyqtyń qurylýy týraly qazaqstandyq jetekshi teatrlardyń basshylary jarııalady. Bul sheshimdi qoldaǵandardyń qatarynda M.Áýezov atyndaǵy Qazaq memlekettik akademııalyq drama teatry, Ǵ.Músirepov atyndaǵy Qazaq memlekettik akademııalyq balalar men jasóspirimder teatry, N.Sats atyndaǵy orys memlekettik akademııalyq balalar men jasóspirimder teatry, M. Lermontov atyndaǵy orystyń memlekettik akademııalyq drama teatry, Memlekettik respýblıkalyq káris mýzykalyq komedııa teatry, Memlekettik respýblıkalyq uıǵyr mýzykalyq komedııa teatry, Respýblıkalyq nemis drama teatry jáne t.b. mádenı oshaqtardyń basshylary bar.
«Jańa kásibı qaýymdastyqty qurý týraly sheshim Teatr qaıratkerleri odaǵy (TQO) jáne onyń jetekshisi Tuńǵyshbaı Jamanqulovtyń esimimen baılanysty daý-damaılardyń bitpes legine oraı qabyldandy», - delingen mınıstrlik taratqan aqparatta.
Habarlamaǵa súıensek, teatr salasynyń mamandary onymen bir mezgilde TQO-dan shyǵý týraly sheshim qabyldaǵan.
«Teatr qaıratkerleri otandyq teatr ónerine qoldaý kórsetý boıynsha mindetterin júzege asyrýdy toqtatqan uıymda ózderiniń múshelik etýin odan ári jalǵastyrý múmkin emes dep sanaıdy. TQO-dan shyǵýdyń taǵy bir sebebi - Odaq jetekshisi T. Jamanqulovtyń uıymnyń bedeline nuqsan keltirip júrgen is-áreketteri. Munda T. Jamanqulovtyń esimi «Fenıks» fılmine baılanysty sybaılas jemqorlyq sıpatyndaǵy daý-damaıda atalýy meńzelip otyr», - delingen taratylǵan málimette.
«Biz «Qazaqstan teatrlar assotsıatsııasynyń» maqsattary men mindetteri zaman talabyna saı bolyp, halyqaralyq deńgeıde rýhanı baı mádenıetimizdi jan-jaqty kórsetetinimizdi málimdeımiz», - dep jazylǵan Memlekettik teatrlar quryltaı jınalysynyń sheshiminde.
