Teatrlandyrylǵan qoıylym, akýlanyń tisi: Mınıstrler 8 naýryzda jubaıyna qandaı syılyq beredi
ASTANA. KAZINFORM – 8 naýryz – halyqaralyq áıelder merekesi kúni erler qaýymy názik jandarǵa erekshe kóńil bólip, syılyq jasaıdy. Bireý anasyn, ekinshisi jubaıyn, kelesi bireý qyzyn barynsha qýantqysy keledi. Osy mereke qarsańynda Kazinform agenttiginiń tilshileri mınıstrler men kvazımemlekettik uıym basshylarynan alǵan jáne jasaǵan erekshe syılyǵy týraly suraǵan edi.
Ǵylym jáne joǵary bilim mınıstrliginiń basshysy Saıasat Nurbek jubaıyna taýyp alǵan akýlanyń tisin syılapty.
«Ózderińiz biletindeı, Qazaqstannyń batysynda buryn úlken Tetıs muhıty bolǵan. Akýlanyń tisine qazir 2,5 mıllıon jyl, ol óte jaqsy saqtalǵan. Ony jubaıyma ǵylymmen aınalysatyn adam retinde berdim. Basynda ol azdap renjidi, biraq men syılyqtyń qundylyǵyn túsindirgenimde, ókpesi basyldy. Bul joly men jubaıymdy tańǵaldyramyn, óıtkeni men kúni boıy (8 naýryzda) úıde bolamyn. Sebebi biz qazir demalyssyz jumys isteımiz, osy ýaqyt ishinde bizde birde-bir demalys bolǵan joq. Jubaıym maǵan «Úıde bol, men úshin sol eń úlken syılyq» dep aıtady», - dedi mınıstr.
Oqý-aǵartý mınıstri Ǵanı Beısembaev merekelik otbasylyq dástúri týraly aıtyp berdi.
«Jyl saıyn 8 naýryzda jubaıyma úı sharýasyna kómektesemin, dastarqan jaıyp, merekelik palaý pisiremin. Bul taǵamdy meniń otbasym erekshe jaqsy kóredi. Meniń bes balam jáne eki nemerem bar. Bul kúni bárimiz birge áıelimdi, anamyzdy jáne ájemizdi merekesimen quttyqtap, otbasylyq jaılylyq syılaımyz», - dep bólisti vedomstvo basshysy.
Atalǵan merekeni qarsy alýda Sý resýrstary jáne ırrıgatsııa mınıstri Nurjan Nurjigitovtiń de óz dástúri bar eken.
«Ádettegideı 8 naýryzda men jubaıyma gúl syılaımyn, bul dástúrge aınaldy. Bizdiń jastyq shaǵymyzda erekshe syılyq jasap, birinen biri ozyp tańǵaldyrý degen bolǵan joq. Eń bastysy – otbasymen birge bolý jáne kóńil bólý. Osy sátti paıdalanyp, jubaıyma alǵys aıtqym keledi jáne elimizdiń áıelder qaýymyn merekesimen quttyqtaımyn. Olarǵa áıel baqytyn, amandyq pen zor densaýlyq tileımin», - dedi mınıstr.
Ádilet mınıstri Azamat Esqaraev «8 naýryz merekesine (anańyzǵa, jubaıyńyzǵa, ápke-qaryndasyńyzǵa, qyzyńyzǵa) qandaı erekshe syılyq jasadyńyz?» degen saýalǵa qysqa ǵana jaýap berdi.
«8 naýryzda anam men qyzdaryma qyzǵaldaq syılaımyn», - dedi ol.
Taǵy bir erekshe syılyq Mádenıet jáne aqparat mınıstri Aıda Balaevaǵa jaqyndarynan buıyrypty.
«Syılyq alǵan jaqsy. Al shyn júrekten jasalǵan syılyq, bárinen qymbat. Meniń 40 jyldyq mereıtoıymda týystarym men balalarym «Aıda» teatrlandyrylǵan qoıylymyn kórsetti. Bir qyzyǵy, olardyń eshqaısysy horeografııa, dramatýrgııamen aınalyspaıdy, ıaǵnı olar óner salasynda jumys istemeıdi. Men úshin arnaıy daıyndalyp, sahnalady. Qoıylym keremet jarqyn ári umytylmas bolyp shyqty», - dedi mınıstr.
«Qazposhta» AQ basqarma tóraǵasy Ásel Janasova úshin 8 naýryzda balalarynyń qoldan jasaǵan gúlden artyq syılyq joq eken.
«Meniń uldarymnyń túrli tústi qaǵazdan jasaǵan raýshan gúl shoqtaryn erekshe aıtyp ótkim keledi. Súıispenshilikpen ári qoldan jasalǵan. Ondaı sátte ózińdi álemdegi eń baqytty adam sezinesiń», - dep bólisti elimizdiń bas poshtashysy.
