Teatr jáne kıno sahnasynda somdaǵan rólderińiz sizdiń ónerdegi izińiz, týǵan halqyńyzǵa, qazaq halqyna sińirgen zor eńbegińizdiń belgisi - Elbasynyń Z.Sháripovany mereıtoıymen quttyqtaýy
ASTANA. 28 qańtar. QazAqparat /Marlan Jıembaı/ - Búgin elordadaǵy Prezıdenttik mádenıet ortalyǵynda Qazaqstannyń halyq ártisi Zámzágúl Sháripovanyń 80 jasqa tolýyna arnalǵan «Qazaq teatrynyń Qaragózi» atty shyǵarmashylyq kesh ótti.
Mádenı sharaǵa arnaıy qatysqan QR Mádenıet jáne aqparat mınıstri Darhan Myńbaı mereıtoı ıesin týǵan kúnimen quttyqtap, Elbasy Nursultan Nazarbaevtyń quttyqtaýyn oqyp berdi.
«Qurmetti Zámzágúl Núsipbaıqyzy, sizdi adam ómiriniń asa aıtýly belesi 80 jasqa tolǵan úlken mereıtoıyńyzben quttyqtaımyn. Halqymyz ózińizdi ulttyq teatr jáne kıno óneriniń kórnekti ókilderiniń biri retinde jaqsy biledi. Ulttyq mádenıetimizdiń órkendeýine qosqan úlesińiz eleýli. Jarty ǵasyrdan astam ýaqyt boıy teatr sahnasynda dańqty óner juldyzdarymen birge eńbek ete júrip, júzden astam keıipkerdi sheberlikpen somdadyńyz. Solardyń arasynda, ásirese, Ǵabıt Músirepovtiń «Aqan seri - Aqtoqtysyndaǵy» Aqtoqty, Muhtar Áýezovtiń «Aıman-Sholpanyndaǵy» Aıman, «Qarakózindegi» Qarakóz, Sábıt Muqanovtyń «Shoqan Ýálıhanovyndaǵy» Aıjan, Shekspırdiń «Ottelosyndaǵy» Dezdemona obrazdary kórermenderdiń jaqsy esinde. Otan aldyndaǵy eńbekterińiz laıyqty baǵalanyp, Qazaqstannyń halyq ártisi ataǵyna ıe boldyńyz. «Otan» ordeniniń ıegeri atandyńyz. Osynyń bári-bári sizdiń ónerdegi izińiz, týǵan halqyńyzǵa, qazaq halqyna sińirgen zor eńbegińizdiń belgisi dep bilemin», - delingen Elbasy quttyqtaýynda.
Sonymen qatar Memleket basshysy Qazaqstannyń halyq ártisine myqty densaýlyq, baıandy baqyt, otbasyna amandyq pen ıgilikter tileıtindigin jetkizgen.
Elbasynyń quttyqtaýyn tapsyrǵannan keıin Mádenıet jáne aqparat mınıstri mereıtoı ıesiniń ıyǵyna qamzol japty.
«Tolǵanyp tur júregim, Elbasyna alǵys aıtý tilegim. Elbasy, siz qas batyrsyz, danasyz, Jer betinde teńdesi joq danasyz. Elińizge panasyz, ómir jasyńyz uzaq bolyp, júzge de áli barasyz. Sondyqtan da halqyńyzdyń júreginde, máńgilikke qalasyz», - dedi tebirengen mereıtoı ıesi Z.Sháripova.
