Teatr maýsymy qorytyndylandy: 2,8 mln-nan astam kórermen spektakl tamashalady
ASTANA. KAZINFORM — 2025-2026 jylǵy teatr maýsymy elimizdiń teatrlary úshin tabysty aıaqtaldy. Osy kezeńde el teatrlary 16 myńnan astam spektakl usynyp, 410 jańa qoıylymdy sahnalady. Jalpy 2 832 835 kórermen teatr qoıylymyn tamashalady.
Maýsymnyń basty jetistikteriniń biri – teatr repertýarynyń mazmuny men janrlyq aıasynyń keńeıýi. Aıryqsha qoıylymdardyń qatarynda «Astana Opera» teatryndaǵy «Qypshaq qyzy Appaq» operasy, Abaı atyndaǵy Qazaq ulttyq opera jáne balet teatryndaǵy «Uly Jibek joly» baleti, «Astana Balet» teatryndaǵy «Karmına Býrana» balet-kantatasy, Qalıbek Qýanyshbaev atyndaǵy Qazaq ulttyq mýzykalyq drama teatryndaǵy Ábish Kekilbaevtyń «Kúı» dramasy jáne Mıhaıl Lermontov atyndaǵy Ulttyq orys drama teatrynda sahnalanǵan «Gospoda Golovlevy» spektakli bar.
Maýsym boıy teatr ujymdary el ishinde de, shetelde de belsendi óner kórsetti. Osy kezeńde 539 gastrol uıymdastyrylyp, teatrlar 191 halyqaralyq jáne respýblıkalyq festıvalge qatysty. Bul teatr óneriniń elimizdiń ár óńirindegi kórermenge keńinen jol tartýyna jáne qoıylymdardyń keńinen tanylýyna serpin berdi.
Elimizdiń teatrlary halyqaralyq deńgeıde de joǵary nátıjelerge qol jetkizdi. Ǵabıt Músirepov atyndaǵy Qazaq memlekettik akademııalyq balalar men jasóspirimder teatry «Ulpan» spektaklimen Bishkekte ótken «ART-ORDO» halyqaralyq teatr festıvaline qatysyp, Gran-prı júldesimen qatar, tórt atalym boıynsha marapatqa ıe boldy.
Halyqaralyq baıqaýlarda ózge shyǵarmashylyq ujymdar da tabysty óner kórsetti. «Astana Opera» teatrynyń «El Voice» vokal toby Stavropol qalasynda ótken «Soldatskıı konvert» halyqaralyq baıqaý-festıvalinde Gran-prı jeńip aldy. Al «Astana Opera» teatrynyń skrıpkashysy Baǵdat Ábilhanov Dalıan qalasynda ótken GRAND ART EXPRESS-CHINA halyqaralyq oryndaýshylyq óner baıqaýynda І oryn ıegeri atandy.
Aıta ketelik jyl basynan beri elimizdegi kontsertterdi 1,7 mıllıonnan asa adam tamashalady.
