«Teatr kóktemi» festıvali ótedi
ALMATY. Naýryzdyń 19-y. QazAqparat /Erlik Erjanuly/ - Almatyda naýryzdyń 23-27 kúnderi Qazaqtyń Muhtar Áýezov atyndaǵy akademııalyq drama teatrynda dástúrli «Teatr kóktemi-2010» festıvali ótedi,
dep habarlaıdy QazAqparat.
Naýryz merekesi men Halyqaralyq teatr kúnine oraı dástúrli túrde jyl saıyn uıymdastyrylatyn bul shara bıyl 11-shi ret ótpek. Bıyl ol Qazaqstannyń jáne KSRO-nyń halyq ártisi, Memlekettik syılyqtyń ıegeri Sábıra Maıqanovanyń rýhyna arnalyp otyr. Festıvalde Ú.Ǵadjybekovtiń «Arshyn-Malalan» mıýzıkli, T. Jújenoǵlynyń «Kóshkin» áfsanasy, M. Baıdjıevtiń «Qylmys» dramasy, T. Nurmaǵambetovtiń «Qojanasyr tiri eken» komedııasy jáne D. Isabekovtiń «Muragerler» dramasy qoıylmaq. Olardyń sońǵysy osy shara kezinde tuńǵysh ret kórermen nazaryna usynylǵaly otyr.
Sábıra Maıqanova 1914 jyly qańtardyń 1-inde Qyzylorda oblysy, Syrdarııa aýdanynda dúnıege kelgen. 1932 jyly Qazaq drama teatryna qabyldanǵan áıgili sahna sheberi 1936 jáne 1958 jyldary Máskeýde ótken qazaq ádebıeti men óneriniń onkúndigine jáne 1973 jyly Irannyń Shıraz qalasyndaǵy 2-shi halyqaralyq teatr festıvaline qatysqan. 1995 jyly ómirden ozǵan áıgili sahna sańlaǵynyń týǵanyna bıyl 96 jyl boldy. Al ıÝNESKO janyndaǵy Halyqaralyq teatr ınstıtýtynyń Venada ótken HІ-shi kongresinde naýryzdyń 27-si dep bekitilgen Halyqaralyq teatr kúni 1962 jyldan beri atap ótilip keledi.
