Teatr basshylary esep berdi
ASTANA. QazAqparat - Búgin QR Mádenıet jáne sport mınıstrliginde elimizdegi respýblıkalyq teatrlardyń basshylary ótken jyly atqarǵan jumystary jaıynda esep berdi, dep habarlaıdy QazAqparat tilshisi.
M.Áýezov atyndaǵy Qazaq memlekettik akademııalyq drama teatry dırektorynyń mindetin atqarýshy Sábıt Ábdiqalyqovtyń aıtýynsha, teatr ujymy ótken jyldyń 11-18 shildesi aralyǵynda Frantsııanyń Avınon qalasynda ótken "Avınon-2018" halyqaralyq festıvaline qatysqan.
"M.Áýezov teatry osy festıvalge qazaq eliniń atynan qatysyp, óner kórsetken birinshi óner ujymy sanalady. Festıvalde belgili lıtvalyq rejısser Ionas Vaıtkýstyń rejısserlyǵymen Iran-Ǵaıyptyń "Qorqyt" qoıylymy sahnalanyp, teatrymyzdyń betke ustar týyndysyn, shyǵarmadaǵy túrkilik mádenıettiń domınanttaryn, baı folklorlyq murasyn joǵary kórkemdik deńgeıde frantsýz aýdıtorııasyna pash etti. 72-shi ret ótken Avınon festıvaline qatysý teatr úshin jaqsy tájirıbe boldy", - dedi ol.
Al Ǵ.Músirepov atyndaǵy Qazaq memlekettik akademııalyq balalar jáne jasóspirimder teatry dırektorynyń mindetin atqarýshy Azamat Satybaldy teatr repertýarynda 41 qoıylym bar ekendigin aıtty.
"Onyń 29-y eresekterge arnalǵan qoıylym bolsa, 12-si balalarǵa arnalǵan ertegiler. Jalpy, qazirgi órkenıetke umtylý, jan-jaqty damý kezeńinde baıyrǵy ulttyq qundylyqtarymyzdy saqtaı otyryp, jańa zaman jetistikteri men ata-dástúrimizdi sabaqtastyra "Rýhanı jańǵyrýǵa" jol sala bildik", - dedi Azamat Satybaldy.
Shara barysynda Respýblıkalyq memlekettik akademııalyq koreı mýzykalyq komedııa teatrynyń dırektory Lıýbov Nı, Q.Qojamııarov atyndaǵy memlekettik akademııalyq uıǵyr mýzykalyq komedııa teatrynyń kórkemdik jetekshisi Murat Ahmadıev ótken jyly atqarǵan jumystary jaıynda esep berdi.
