TDM-2030: BAQ arasynda baıqaý jarııalandy
NUR-SULTAN. QazAqparat – Buqaralyq aqparat quraldary arasynda «TDM – 2030: Qazaqstannyń turaqty damý maqsattaryna qol jetkizýdegi úlesi» atty respýblıkalyq konkýrs jarııalandy, dep habarlaıdy QazAqparat tilshisi.
«Jasyl ekonomıka jáne G-Global-dy damytý Koalıtsııasy» ZTB, «Qazaqstannyń ekologııalyq uıymdarynyń Qaýymdastyǵy» ZTB, QR ekologııa, geologııa jáne tabıǵı resýrstar mınıstrligi, QR Ulttyq ekonomıka mınıstrligi birlesip ótkizetin konkýrs - gazettegi úzdik maqala, ınternet jelilerindegi úzdik maqala, úzdik radıobaǵdarlama, úzdik telebaǵdarlama, úzdik telesıýjet atalymdary boıynsha ótkiziledi.
Baıqaý maqsaty - turaqty damý maqsattaryn (TDM-2030) iske asyrýdy jarııa etýge buqaralyq aqparat quraldarynyń ókilderin tartý jáne Qazaqstannyń «jasyl» ekonomıkaǵa kóshýine baılanysty TDM-2030 mindetteri men ındıkatorlaryna qol jetkizýine azamattyq qoǵamnyń keń toptarynyń qatysýy.
Baıqaýǵa 2020 jylǵy 1 qańtar men 1 qazan aralyǵynda jarııalanǵan jumystar qabyldanady. Materıaldar uıymdastyrýshylardyń www.greenkaz.org saıtynda qabyldanady.
Jeńimpazdar qurmet gramotalarymen jáne aqshalaı syılyqtarmen marapattalady. Marapattaý rásimi bıylǵy 7-8 qarashada ótedi.
