Tbılısıdegi qaqtyǵys: Polıtsııa ereýilshilerge qarsy rezeńke oq atyp, sý shashty

TBILISI. QazAqparat - Grýzııa astanasyndaǵy ereýildi basý úshin polıtsııa kóz jasaýratatyn gaz, rezeńke oqtar jáne sýatqyshtardy qoldandy. Narazylyq sharasyna shyqqandar Úkimet músheleriniń otstavkaǵa ketýin talap etip, parlament ǵımaratyna kirmek bolǵan, dep habarlaıdy «QazAqparat» BBC-ge silteme jasap.

Jappaı narazylyq beısenbi, 20 maýsym kúni Reseı delegatsııasynyń Tbılısıde ótken Pravoslavıe parlamentaralyq Bas assambleıasyna qatysýynan keıin bastaldy. Delegatsııany bastap kelgen RF Memlekettik Dýmasynyń depýtaty Sergeı Gavrılovtyń sessııa kezinde Grýzııa Parlamenti spıkeriniń kreslosyna otyryp, jınalǵandarǵa orys tilinde sóılegeni oppozıtsııanyń narazylyǵyn týdyrǵan. Muny qorlaý dep baǵalaǵan Grýzııanyń oppozıtsııalyq depýtattary narazylyqtaryn bildirip, Bas assambleıanyń jumysyn toqtatty.

Frans press agenttiginiń habarlaýynsha, 10 myńǵa jýyq adam Parlament ǵımaratynyń aldyna jınalyp, polıtsııanyń qurǵan shebin jaryp ótip, Parlament spıkeri Iraklıı Kobahıdze jáne basqa da resmı tulǵalardyń otstavkaǵa ketýin talap etken.

Polıtsııa shabýyldy toıtaryp, juma kúni tańǵa jýyq Rýstavelı dańǵylyna jınalǵandardyń basym bóligin taratqan.

VVS tilshisiniń málimetinshe, ereýilshilerdiń bir bóligi áli taraǵan joq.

Olar Tbılısı fılarmonııasy ǵımaratynyń mańaıynda barrıkada qurý úshin kósheni avtobýs, qoqys jáshikterimen jaýyp tastaǵan.

Densaýlyq saqtaý mınıstri aktsııaǵa qatysqandardyń 14-i jáne 38 polıtseıdiń jaralanǵanyn habarlady.

Burynǵy bıleýshi partııa «Birtutas ulttyq qozǵalystyń» lıderleriniń biri, Parlament depýtaty Roman Gotsırıdze jumaǵa qaraǵan túni jýrnalısterge júzden astam azamattyń jaraqat alǵanyn málimdegen.

Grýzııa ІІM polıtsııa Parlament ǵımaratyna kirmek bolǵandardy toqtatý úshin zańmen belgilengen arnaýly quraldar qoldanylǵanyn málimdedi.

Grýzııa premer-mınıstri Mamýka Bahtadze burynǵy prezıdent Mıhaıl Saakashvılı negizin qalaǵan oppozıtsııalyq «Birtutas ulttyq qozǵalys» partııasyn eldi quqyq aıasynan shyǵarmaq boldy dep aıyptady.

«Grýzııada kez kelgen adamdar tobynyń narazylyq bildirý quqyǵy bar. Bul jolǵy narazylyqtyń ádil bolǵanyn taǵy qaıtalaımyn. Biraq biz baqylap otyrǵan sońǵy eki saǵat ishinde agressııashyl top, «Ulttyq qozǵalys» Grýzııany elde máńgilikke qurylǵan quqyqtyq aıadan shyǵarý úshin kúsh qoldanyp jatyr», - dedi Bahtadze.