Tbılısıdegi jańa halyqaralyq áýejaı qashan paıdalanýǵa beriledi

ASTANA. KAZINFORM – Tbılısıdegi jańa halyqaralyq áýejaı 2031 jyly paıdalanýǵa beriledi. Jobanyń quny 1,25 mlrd dollardy quraıdy, dep habarlaıdy agenttiktiń Grýzııadaǵy menshikti tilshisi.

Grýzııanyń ekonomıka jáne ornyqty damý mınıstri Marıam Kvrıvıshvılıdiń aıtýynsha, jańa áýejaı – avıatsııa salasynyń uzaq merzimdi damýy men týrıstik ınfraqurylymdy keńeıtý jolyndaǵy strategııalyq mańyzy bar joba.

Qurylys Azııa damý bankiniń qoldaýymen júrgizilgen aýqymdy zertteý men tehnıkalyq-ekonomıkalyq negizdemege súıengen. 2050 jylǵa deıingi jolaýshylar aǵyny, júk tasymaly men týrızm kórsetkishteriniń boljamy qazirgi áýejaıdyń bolashaqtaǵy suranysty tolyq qamtı almaıtynyn kórsetken.

— Bizdiń maqsatymyz – eldiń jolaýshylar men týrıstik aǵynnyń eń joǵary kólemin qabyldaý qabiletin qamtamasyz etý. Qazirgi áýejaıdyń qýaty suranys dınamıkasyna sáıkes kelmeı otyr, — dedi Kvrıvıshvılı.

Mınıstrdiń aıtýynsha, qazirgi ýaqytta Grýzııa avıatsııa salasynda rekordtyq ósimdi bastan keshirip jatyr. Elde 70-ten astam áýe kompanııasy 120-dan asa tikeleı baǵyt boıynsha turaqty reıster oryndaıdy. 2025 jyldyń alǵashqy úsh toqsanynda týrızmnen túsken kiris 3,6 mlrd dollardy quraǵan.

Úkimet josparyna sáıkes, jańa Tbılısı halyqaralyq áýejaıy 2031 jyly ashylady.

Buǵan deıin Grýzııada jolaýshylar tasymalynyń rekordtyq ósimi tirkelgeni habarlanǵan bolatyn.