Tbılısıde sherýge qatysqan 8 adam aýrýhanaǵa jetkizildi
ASTANA. KAZINFORM – Grýzııa Densaýlyq saqtaý mınıstrligi Tbılısıdegi parlament janynda sheteldik agentter týraly zańǵa qarsy narazylyq aktsııasyna shyqqan 8 adamnyń aýrýhanaǵa jetkizilgenin málimdedi. Bul týraly NGnewsgeorgia jazdy.
«Zardap shekkender túrli dene jaraqatyn aldy. Onyń ishinde bet, bas jáne dene bólikteriniń jaraqattary bar. Keıbireýlerine ýlaný jáne tynys alý joldarynyń asqynýy dıagnozy qoıyldy», - delingen vedomstvo habarlamasynda.
Zardap shekkenderdiń biri aýrýhanadan shyqty. Jeti adam dárigerlerdiń baqylaýyna alyndy.
Qazirgi kezde 20 jedel járdem brıgadasy kezekshilik etýde. Ondaǵan sherýshige, sondaı-aq ІІM-niń bir qyzmetkerine oqıǵa ornynda kómek kórsetildi.
1 mamyr kúni keshke Grýzııa parlamenti aldyna myńdaǵan adam jınalyp, zańnyń keri qaıtarylýyn talap etti. Arnaıy jasaq ǵımarat kireberisinde demonstranttarǵa qarsy kózden jas aǵyzatyn gaz ben sý atqysh qurylǵylar qoldanǵan. Sondaı-aq rezeńke oqtar qoldanǵany týraly habarlandy.
BAQ budan zardap shekkender túsirilgen kadrlardy kórsetkenimen, Grýzııanyń ІІM olardy qoldanǵanyn joqqa shyǵardy.
