Tbılısıde parlament ǵımaraty mańyndaǵy sherýlerde polıtsııanyń 32 qyzmetkeri jaraqat aldy

ASTANA. KAZINFORM — Grýzııa astanasy Tbılısıde polıtsııa men narazylyq bildirýshiler arasynda qaqtyǵys bolyp, 40-tan astam adam ustaldy. Onyń arasynda zardap shekkender de bar, dep habarlaıdy Kazinform menshikti tilshisi.

Tbılısıdegi stıhııaly sherý premer-mınıstr Iraklıı Kobahıdzeniń beısenbi kúni bıliktegi «Grýzın armany — Demokratııalyq Grýzııa» partııasy Eýroodaqqa kirý týraly kelissózder máselesin 2028 jyldyń sońyna deıin kún tártibine qospaý jáne qaýymdastyq tarapynan bıýdjettik granttardan bas tartý týraly sheshim qabyldaǵanyn málimdegennen keıin bastaldy.

Grýzııanyń Іshki ister mınıstrligi qoǵamdyq qaýipsizdikke qaýip tónip turǵanyn alǵa tartyp, sherýshilerdi tarap ketýge birneshe ret shaqyrǵan. Alaıda shıelenis bir túnde kúsheıip, sherýshiler men polıtsııa arasynda qaqtyǵys bastaldy. 

Іshki ister mınıstrliginiń habarlaýynsha, sherýshiler polıtsııaǵa shyny bótelkeler, tastar, metall jáne pırotehnıkalyq zattar laqtyryp, ınfraqurylymǵa, jol tósemine jáne beınebaqylaý kameralaryna zaqym keltirgen. Jekelegen nysandar da órtenip, barrıkadalar ornatyldy, al Tbılısı qalalyq ákimshiligi men jeke tulǵalardyń múlkine zııan keltirildi.

«Mıtıngke qatysýshylardyń zańsyz jáne zorlyq-zombylyq áreketteri saldarynan ІІM-niń 32 qyzmetkeri zardap shekti. Olardyń keıbiri basy, kózi, denesi aýyr jaraqatyn alǵan. 13 qyzmetkerge ota jasaldy. Zardap shekkenderdiń biri áli de medıtsınalyq mekemede jatyr», — delingen vedomstvo habarlamasynda. 

Grýzııanyń ІІM arnaıy quraldardy qoldaný týraly eskertip, mıtıng «jıyndar men sherýler týraly zańnyń sheńberinen shyǵyp ketti» dep málimdedi. Qaýipsizdik kúshteri Tbılısı ortalyǵyndaǵy Rýstavelı dańǵylynda jınalǵan sherýshilerge qarsy sý atqyshtar men kózden jas aǵyzatyn gaz qoldandy.

29 qarasha kúni tańerteń vedomstvo demonstranttar taratylyp, 43 adamnyń ustalǵany týraly habarlady. Mıtıngide tirkelgen zań buzýshylyqtar boıynsha — múlikti búldirý nemese joıý, polıtsııa qyzmetkerine shabýyl jasaý baptary boıynsha qylmystyq ister qozǵaldy. 

Narazylyqtarǵa jaýap retinde Grýzııa parlamentiniń basshylyǵy qaýipsizdiktiń qyzyl deńgeıin jarııalady. Bul sheshim EO-ǵa kirý jónindegi kelissózderdiń toqtatylýyna baılanysty qabyldandy.

«Qyzyl deńgeı kezinde Grýzııa parlamentine qaýip erekshelikterin eskere otyryp, parlament apparatynyń basshysy belgilegen adamdardan basqa eshkim kirgizilmeıdi», — dep habarlady zań shyǵarýshy organnyń baspasóz qyzmeti.

Sherýshilerge Grýzııa prezıdenti Salome Zýrabıshvılı de qosyldy. Ol bılikti parlament saılaýyn qaıta ótkizýge shaqyrdy. 

Buryn habarlanǵandaı, bılik partııasy el prezıdenttigine burynǵy fýtbolshy Mıhaıl Kavelashvılıdi usyndy. Grýzııa oppozıtsııasy 26 qazandaǵy saılaýdan keıin narazylyq sherýlerin turaqty túrde ótkizýge ýáde berdi.

Eske salsaq, Grýzııa parlamenti jalpy otyrysta prezıdent saılaýynyń merzimin belgiledi.

Daýys berýge parlamenttiń 85 depýtaty tirkeldi. 80 depýtat saılaýdy 14 jeltoqsanda ótkizýdi qoldap, birde-biri qarsylyq bildirmedi.