Tbılısıde halyqaralyq izdeýde júrgen esirtki qylmyskerleri ustaldy
ASTANA. KAZINFORM — Qazaqstan men Grýzııa Іshki ister mınıstrlikteriniń Tbılısıdegi kelissózderinen keıin sıntetıkalyq esirtki óndirýmen aınalysqan erli-zaıypty ustaldy. Bul týraly Polisia.kz jazdy.
Qazaqstan men Grýzııanyń ishki ister organdary halyqaralyq izdestirý jáne transulttyq qylmysqa qarsy kúres baǵytyndaǵy praktıkalyq yntymaqtastyqty kúsheıtýdi jalǵastyrady.
Eske salsaq, aqpanda Astanada Qazaqstan men Grýzııa ІІM basshylarynyń kezdesýi ótip, taraptar uıymdasqan qylmysqa, esirtkiniń zańsyz aınalymyna jáne halyqaralyq izdeýdegi qylmyskerlerge qarsy kúrestegi úılestirýdi kúsheıtýge kelisken bolatyn. Jýyrda Qazaqstan ІІM basshysy Erjan Sádenov jumys saparymen Tbılısıge baryp, Grýzııa ІІM mınıstri Sýlhan Tamazashvılımen kelissózder júrgizdi. Sonymen qatar Grýzııa Premer-mınıstri Iraklıı Kobahıdzeniń qabyldaýynda boldy.
Yntymaqtastyqtyń jandanýy aıasynda birlesken jumystyń naqty nátıjeleri de bar. Atap aıtqanda, 2026 jyldyń naýryz aıynan beri Grýzııa aýmaǵynda Qazaqstan quqyq qorǵaý organdary izdegen 15 adam ustaldy.
— Olardyń qatarynda sıntetıkalyq esirtki óndirýdi uıymdastyrdy degen kúdikke ilingen erli-zaıypty da bar. Qazaqstan ІІM suraýy boıynsha Tbılısıde mefedron óndirýdi uıymdastyrdy dep kúdikke ilingen Qazaqstan azamaty ustaldy. Tergeý málimetinshe, ol 2023 jyldyń qazan aıynan 2024 jyldyń aqpan aıyna deıin sybaılastarymen birge Almaty oblysynda arnaıy jabdyqtalǵan esirtki zerthanasynda sıntetıkalyq esirtki óndirisin uıymdastyryp, hımıktiń rólin atqarǵan, — delingen habarlamada.
Tbılısıde halyqaralyq izdeýde júrgen onyń jubaıy da qolǵa tústi. Tergeý barysynda onyń Almaty jáne Qaraǵandy oblystaryndaǵy sıntetıkalyq esirtki óndirisine qatysty qylmystyq áreketterdiń qarjylyq súıemeldeýine jaýap bergeni anyqtaldy.
Qazirgi ýaqytta ustalǵandardy Qazaqstanǵa ekstradıtsııalaý máselesi qarastyrylyp jatyr.
Eske sala keteıik, buǵan deıin Bas prokýratýra men Іshki ister mınıstrliginiń Interpol Ulttyq Ortalyq bıýrosynyń qyzmetkerleri, Qazaqstannyń Grýzııadaǵy elshiliginiń qoldaýymen atalǵan elden para bergeni úshin qylmystyq jaýaptylyqqa tartýǵa Qazaqstan azamatyn ekstradıtsııalady.
