Tbılısıde áıgili «Fýksas qubyrlaryn» bólshekteý jumystary bastaldy
ASTANA. KAZINFORM — Tbılısıde qaladaǵy zamanaýı sáýlet óneriniń eń tanymal nysandarynyń biri – «Rıke qumyralary», nemese «Fýksas qubyrlary» dep atalatyn keshendi bólshekteý jumystary bastaldy. Bul týraly Kazinform agenttiginiń óńirdegi menshikti tilshisi habarlady.
Jumystar 28 shildede bastaldy. Tbılısı qalasy ákimdiginiń Sáýlet qyzmeti bergen ruqsatqa sáıkes, bólshekteý jumystary 2026 jyldyń 25 jeltoqsanyna deıin aıaqtalýy tıis.
Keshen qala ortalyǵyndaǵy Rıke saıabaǵynda ornalasqan. Ol áıgili ıtalııalyq sáýletshi Massımılıano Fýksas jobalaǵan shyny men metaldan turǵyzylǵan tsılındr pishindi eki qurylystan turady. Osy sáýletshiniń jobasymen Tbılısıde Ádilet úıi de salynǵan.
Nysannyń qurylysy 2011 jyly, Mıhaıl Saakashvılı prezıdent bolǵan kezeńde bastalǵan. Munda kontsert zaly, mýzykalyq teatr jáne mádenı ortalyq ashý josparlanǵan edi. Alaıda bılik aýysqannan keıin joba toqtatylyp, paıdalanýǵa berilmedi. On jyldan astam ýaqyt boıy keshen jabyq kúıinde qalyp, birneshe ret ıesin aýystyrǵan.
Qazirgi tańda nysan túrkııalyq ınvestormen baılanysty Macro Property kompanııasyna tıesili. Grýzııanyń buqaralyq aqparat quraldarynyń málimetinshe, keshenniń ornyna qonaqúı salynýy múmkin.
Sonymen qatar, Tbılısı meri Kaha Kaladze buǵan deıin bólshekteý jumystary nysannyń tolyqtaı joıylatynyn bildirmeıtinin aıtqan. Onyń sózinshe, eger menshik ıesi sheshim qabyldasa, metall konstrýktsııalar basqa jerge kóshirilýi múmkin.
Keshendi bólshekteý týraly sheshim Grýzııa qoǵamynda keń talqylaýǵa sebep boldy. Sáýletshiler men ýrbanıster «Fýksas qubyrlaryn» Tbılısıdegi zamanaýı sáýlet óneriniń sımvoldarynyń biri dep sanap, ony saqtap qalýdy qoldaıdy. Al qala bıligi paıdalanylmaǵan nysandy kútip ustaýǵa qomaqty qarjy qajet ekenin alǵa tartyp otyr.
Eske salaıyq, buǵan deıin AQSh prezıdenti Donald Tramptyń otbasy ıelik etetin The Trump Organization kompanııasy Grýzııada eldegi eń bıik záýlim ǵımaratty salatyny habarlanǵan bolatyn.
