Tbılısı qurǵaq porty Orta dálizdi damytýǵa 55 mln dollarǵa deıin ınvestıtsııa salady
ASTANA. KAZINFORM – «Tbılısı qurǵaq porty» jobasynyń ekinshi kezeńin iske asyrýǵa kiristi. Onyń aıasynda Orta dálizdi damytýǵa 55 mln AQSh dollaryna deıin ınvestıtsııa salý josparlanyp otyr, dep habarlaıdy Kazinform agenttiginiń óńirdegi menshikti tilshisi.
Bul týraly kompanııanyń baqylaý keńesiniń tóraǵasy Djemal Inaıshvılı málimdedi.
Onyń aıtýynsha, termınaldyń alǵashqy jumys jyly jobanyń tıimdiligin dáleldegenimen, ony odan ári damytý úshin birqatar logıstıkalyq shekteýlerdi joıý qajet.
Qazir kompanııa «Grýzııa temir jolymen» birlesip Potı porty men Tbılısı arasyndaǵy konteınerlik tasymaldardyń tıimdiligin arttyrý baǵytynda jumys istep jatyr.
– Alǵashqy jumys jylynda jaqsy nátıjege qol jetkizdik. Biz «Grýzııa temir jolymen» óte tyǵyz jumys istep jatyrmyz, óıtkeni jobanyń tabysy temirjol jumysynyń tıimdiligine tikeleı baılanysty. Birlesip qoldanystaǵy kedergilerdi joıýdamyz. Sonymen qatar Potı portynan Tbılısıdegi qurǵaq portqa blok-poıyzdar arqyly konteınerlerdi úzdiksiz ári senimdi jetkizý úshin ózimizdiń temirjol platformalary parkin qurý múmkindigin qarastyryp jatyrmyz, – dedi Djemal Inaıshvılı.
Onyń aıtýynsha, ekinshi kezeń aıasynda jalpy aýmaǵy shamamen 50 myń sharshy metr bolatyn A sanatyndaǵy qoımalar salynady.
Jobaǵa salynatyn ınvestıtsııa kólemi 50–55 mln AQSh dollary shamasynda baǵalanyp otyr. Eger jeke temirjol platformalary parkin qurý jobasy iske assa, ınvestıtsııa kólemi budan da artýy múmkin.
Ekinshi kezeń aıaqtalǵannan keıin porttyń jyldyq ótkizý qabileti 200 myń TEU-ge deıin jetedi. Joba Grýzııanyń óńirlik logıstıkalyq hab retindegi pozıtsııasyn nyǵaıtyp, Orta dáliz boıyndaǵy mýltımodaldy tasymal múmkindigin keńeıtýge baǵyttalǵan.
Eske salaıyq, «Tbılısı qurǵaq portynyń» resmı ashylýy 2025 jylǵy 3 maýsymda, bir aılyq synaq rejıminen keıin ótti. Jobanyń birinshi kezeńine 20 mln AQSh dollary ınvestıtsııa salyndy. Al 2024 jyly Birikken Arab Ámirlikteriniń AD Ports Group kompanııasy termınal aktsııalarynyń 60 paıyzyn satyp alyp, onyń strategııalyq seriktesine aınaldy.
Aıta keteıik, Grýzııa arqyly Orta dálizben ótetin júk tasymalynyń kólemi 20%-dan astamǵa artty.
