Tbılısı qalasynda aýyr atletıkadan Eýropa chempıonaty ótip jatyr
ASTANA. QazAqparat - Osy kúnderi Grýzııanyń astanasy Tbılısı qalasynda aýyr atletıkadan Eýropa chempıonaty ótip jatyr. 11 sáýir kúni bastalǵan dodanyń qazir qyzǵan shaǵy. Ásirese, Táýelsiz Memleketter Dostastyǵynyń quramyndaǵy elderdiń sportshylary joǵary nátıjeler kórsetýde. Qazirgi ýaqytta Ázerbaıjan, Ýkraına, Armenııa, Moldova sportshylary ártúrli salmaqtar boıynsha jeńimpaz atandy. Sonymen qatar Túrkııa eliniń sportshylary da altyn júldeni jeńip aldy. Kórshi Reseı eliniń sportshylarynyń enshisinde kúmis jáne qola júldeler buıyrdy. Olar asa aýyr salmaqtaǵy Shyńǵys Mogýshkov pen Tatıana Kasherınaǵa úlken senim artyp otyr.
Aýyr atletıka sportyna qazaqstandyq jankúıerler úlken qyzyǵýshylyqpen qaraıtyny anyq. Tıbılısıde ótip jatqan Eýropa qurlyǵynyń jarysynda qaısy eldiń sportshysy qandaı jetistik kórsetip jatqanyna bizdiń aýyr atletshiler de nazar aýdaratyny anyq. Óıtkeni álem chempıonatynda jáne Olımpıada oıyndarynda Qazaqstan sportshylaryna eýropalyqtardan kimder qarsylas bolatynyn baıqaýǵa bolady.
«Eýrosport» telearnasy osy kúnderi Tbılısı qalasynda ótip jatqan aýyr atletıkadan Eýropa chempıonatyn tikeleı efırde kórsetýde. Jarys kestesine sáıkes búgin, 17 sáýir kúni, Astana ýaqytymen 19-00-de 75 kelige deıingi salmaqtaǵy áıelder synǵa túsedi. Al 22-00-de 94 kelige deıingi salmaqtaǵy erler arasyndaǵy tarysty básekeni tamashalaýǵa bolady.
Erteń jarystyń sońǵy kúni. Astana ýaqyty boıynsha 13-00-de 105 kelige deıingi erler arasyndaǵy báseke bastalady. 16-00-de bastalatyn jarysta 75 keliden joǵary salmaqtaǵy áıelder arasynda Eýropa jeńimpazy anyqtalmaq. Al 19-00-de asa aýyr (105 keliden joǵary) salmaqtaǵy erler ózara synǵa túsip, 2015 jylǵy qurlyq jeńimpazy ataný úshin bar kúshterin salatyn bolady.
