TBEX Asia 2026: Qazaqstanǵa álemniń 250-den astam blogeri men medıa ókili jınaldy
ASTANA. KAZINFORM — Almatyda jetekshi saıahatshy blogerlerdiń, tilshilerdiń, ınflıýenserlerdiń jáne týrızm salasy sarapshylarynyń basyn qosqan TBEX Asia 2026 (Travel Bloggers Exchange) halyqaralyq forýmy aıaqtaldy. Ortalyq Azııada alǵash ret uıymdastyrylǵan bul sharaǵa Soltústik Amerıka, Eýropa jáne Azııadan 250-den astam medıa ókilderi qatysty.
Forým Qazaqstan Respýblıkasy Týrızm jáne sport mınıstrligine qarasty «Kazakh Tourism» UK» AQ, Almaty qalasy ákimdiginiń Týrızm basqarmasy jáne Almaty Tourism Bureau (Visit Almaty) uıymdarynyń birlesken uıymdastyrýymen, sondaı-aq jergilikti jáne halyqaralyq kompanııalardyń seriktestigi aıasynda ótti.
Baǵdarlama sheńberinde qatysýshylar týrıstik baǵyttardy ilgeriletýdiń zamanaýı úrdisterin, tsıfrlyq marketıngti jáne jahandyq týrıstik aǵyndardy qalyptastyrýdaǵy avtorlyq kontenttiń rólin talqylady. Budan bólek, qonaqtar úshin el óńirleri boıynsha: Almaty, Túrkistan, Jetisý, Mańǵystaý jáne Shyǵys Qazaqstan oblystaryna, sondaı-aq Astana — Býrabaı makroóńirine arnaıy saparlar uıymdastyryldy.
Forýmnyń aıtýly oqıǵasy — jıyntyq aýdıtorııasy 76 mıllıonnan asatyn (TikTok-ta 59,1 mln, Instagram-da 9,6 mln jáne YouTube-ta 8,4 mln) birneshe tilde erkin sóıleıtin álemge tanymal bloger Omar Alıevtiń Qazaqstannyń Týrızm elshisi bolyp taǵaıyndalýy edi. Omar Alıev halyqaralyq deńgeıde Qazaqstannyń mádenı áralýandyǵy men ashyqtyǵyn belsendi túrde nasıhattap keledi, al jańa mártebesinde ol eldiń týrıstik áleýetin jahandyq arenada tanytyp, sheteldik jastardyń nazaryn aýdarýdy jalǵastyrady.
— Men árqashan múmkindik sheginen tys úlken maqsattardy armandadym. Búgin ózimmen birge tek óz armandarymdy ǵana emes, Qazaqstannyń atyn da arqalap kelemin. Saparym qaıda baǵyttalsa da, men elimniń rýhyn saqtap, abyroıyn asqaqtatamyn jáne óz tarıhymnyń qaıdan bastalǵanyn eshqashan umytpaımyn, — dep atap ótti Omar Alıev.
TBEX forýmyn ótkizý — AQSh, Kanada, Irlandııa, Chehııa, Ispanııa, Shvetsııa, Gretsııa, Taıland, Fılıppın jáne basqa da elder buǵan deıin tabysty júzege asyrǵan sapaly týrıstik aǵyndy tartýdyń synalǵan halyqaralyq tájirıbesi.
— TBEX deńgeıindegi jobalardyń basty qundylyǵy — olardyń uzaq merzimdi áserinde. Qatysýshylar jasaǵan kontent jyldar boıy jumys istep, bizdiń baǵytqa degen turaqty suranysty qalyptastyrady. Bul medıa belsendilik Qazaqstannyń jergilikti ekonomıkasyna tikeleı qaıtarym beredi — qonaqúılerdiń júktelýi, kólik ınfraqurylymynyń damýy, gastronomııa salasy jáne búkil el boıynsha shaǵyn ári orta bıznesti qoldaý arqyly júzege asady, — dedi «Kazakh Tourism» UK» AQ Basqarma tóraǵasy Talǵat Ǵazızov.
Sondaı-aq shara aıasynda salanyń mamandar áleýetin nyǵaıtýǵa baǵyttalǵan «Kazakh Tourism» UK» AQ men AlmaU Ýnıversıteti arasynda yntymaqtastyq memorandýmyna qol qoıyldy. Kelisim sheńberinde taraptar birlesken bilim berý jobalaryn júzege asyrýdy, praktıkalyq sharalar ótkizýdi jáne stýdentterge taǵylymdamalar uıymdastyrýdy josparlap otyr. Bul bolashaq mamandarǵa tájirıbe jınaqtap, ındýstrııanyń damýyna úles qosýǵa múmkindik beredi.
Forým qatysýshylarynyń jıyntyq aýdıtorııasy 300 mıllıonnan asady. TBEX Asia 2026 sheńberinde qalyptasqan kontent eldi týrıstik baǵyt retinde ilgeriletýdiń uzaq merzimdi quralyna aınalyp, negizgi sheteldik naryqtarda ulttyq týrıstik brendtiń tanymaldylyǵyn nyǵaıtady.
Eske sala keteıik, jaqynda Týrızm jáne sport mınıstrligi elimizde týrızmdi memlekettik qoldaý tetikteri jetildirilip jatqanyn habarlady.
