Tazynyń ólimi: Stsenarıı irikteýine Maǵaýın áńgimesi boıynsha birde-bir ótinim túspegen

ASTANA. KAZINFORM – Mádenıet jáne aqparat mınıstrligi 2026 jyly bıýdjet esebinen túsiriletin fılmderge usynylatyn basym taqyryptardyń qataryna «Ulttyq qundylyq. Tazy» taqyrybyn qosý múmkindigin qarastyrady. Vedomstvonyń Kazinform saýalyna joldaǵan jaýabynda osyndaı málimet aıtylǵan.

- Senat depýtaty Bıbigúl Jeksenbaıdyń usynysy negizinde Muhtar Maǵaýınniń «Tazynyń ólimi» shyǵarmasy jelisimen fılm túsirý úshin qolaıly stsenarıılerdi irikteý jumystary barysynda tıisti stsenarıı kelip túspegendigin habarlaımyz. Budan bólek, mınıstrlik 2026 jylǵy basym taqyryptardyń qataryna «Ulttyq qundylyq. Tazy» taqyrybyn qosý múmkindigin qarastyrady, - dep jazady vedomstvo mamandary.

Al bıylǵa bekitilgen basym taqyryptar mynandaı:

- Oıyn fılmderi sektsııasy - «Qorshaǵan orta, tabıǵatty qorǵaý», «Otan, týǵan jerge degen súıispenshilik», «Tarıh pen taǵylym», «Qazaq ertegileri men epostary», «Balalarǵa arnalǵan fılmder», «Aýyl tirshiligi»;

- Anımatsııalyq fılmder sektsııasy – «Ulttyq qundylyqtar», «Týǵan jerdiń kórkem tabıǵaty», «Ata-anaǵa qurmet», «Adal azamat»;

- Derekti, onyń ishinde hronıkalyq fılmder sektsııasy – «El birligi», «Tarıhtaǵy eleýli oqıǵalar», «Ǵylymı jetistik».

Eske salsaq, Mádenıet jáne aqparat mınıstrligi belgili jazýshy Muhtar Maǵaýınniń «Tazynyń ólimi» atty áńgimesiniń jelisimen kórkem fılm túsirý úshin stsenarıı irikteý jumystaryn bastady.