«Tazy. Ult qazynasy»: Prezıdent Teleradıokesheniniń derekti fılmi Jibek Joly arnasynan kórsetiledi
ASTANA. KAZINFORM — 3 qyrkúıek — Qazaqy tazy men tóbet kúni Jibek Joly telearnasy Prezıdent Teleradıokesheni túsirgen «Tazy. Ult qazynasy» derekti fılmin kórsetedi.
Bıyl Qazaqstanda alǵash ret Qazaqy tazy men tóbet kúni atalyp ótip jatyr. 2026 jyly kúntizbege engen jańa ataýly kún qazaqtyń baıyrǵy ıt tuqymdaryn ulttyq muranyń bir bóligi retinde saqtaýǵa qoǵam nazaryn aýdarýdy kózdeıdi.
Tazy ejelden qazaqtyń «Jeti qazynasynyń» biri sanalady. Bul tuqymnyń tarıhy myńdaǵan jylǵa sozylady. Qazaqstan aýmaǵynan tabylǵan kóne petroglıfterde tazyǵa uqsas ıtterdiń beınesi kezdesedi.
«Tazy. Ult qazynasy» derekti fılminde tazynyń shyǵý tarıhy, tuqymdyq erekshelikteri men qazaq mádenıetindegi orny baıandalady.
Mamandar qazaqy tazyny zertteý, saqtaý jáne tuqymyn jańǵyrtý baǵytynda atqarylyp jatqan jumystar týraly da áńgimeleıdi.
Fılmdi túsirýge Genetıka jáne fızıologııa ınstıtýtynyń ǵalymdary, Zoologııa ınstıtýty zerthanasynyń mamandary, Kınologııalyq federatsııa ókilderi, Qazaqstan kınologtar odaǵynyń prezıdenti men músheleri qatysty.
«Tazy. Ult qazynasy» derekti fılmi 3 qyrkúıek kúni saǵat 18:35–te Jibek Joly telearnasynan kórsetiledi.
Aıta keteıik, keıingi jyldary Qazaqstanda ulttyq ıt tuqymdaryn saqtaý jáne ósirý, olardyń gendik qoryn qorǵaý, halyqaralyq deńgeıde moıyndatý baǵytynda júıeli jumys júrgizilip keledi.
2023 jyly osy salanyń quqyqtyq, uıymdastyrýshylyq jáne ekonomıkalyq negizderin aıqyndaıtyn arnaıy zań qabyldandy.
2023 jyldan beri Qazaqstandaǵy tazy sany tórt ese ósti.
Buǵan deıin ánshi Dımash Qudaıbergen Memleket basshysynyń tazysy men sáıgúligi beınelengen biregeı kadrlardy bólisken edi.
Al naǵyz tazyny qalaı ajyratýǵa bolatyny týraly osy materıaldan oqı alasyzdar.
