Tazy men tóbet týraly ǵylymı derekter bir bazada jınaqtaldy

ALMATY. KAZINFORM — Qazaqstanda keıingi birneshe jylda úlken ǵylymı jumys júrgizilip, tazy men tóbet týraly alǵash ret naqty ǵylymı derek alyndy.

QR ǴJBM Ǵylym komıtetine qarasty Genetıka jáne fızıologııa ınstıtýtynyń jetekshi ǵylymı qyzmetkeri Anastasııa Perfıleva aıtýynsha, bul zertteýler aıasynda qazaqy ıt tuqymdarynyń DNQ banki jasalyp, genetıkalyq pasporttar engizildi.

— 2021 jyly tazynyń genofondyn zertteý jobasy bastalyp, kóp uzamaı tóbetti zerttep, onyń genetıkalyq qoryn saqtaıtyn tehnologııalardy ázirleýge arnalǵan úlken baǵdarlama qolǵa alyndy. Zertteýge Genetıka jáne fızıologııa ınstıtýty, Qazaqstan Zoologııa ınstıtýty, «Qansonar» qaýymdastyǵy, Qazaqstannyń kınologtar odaǵy, veterınarııalyq uıymdar, panajaılar men qoǵamdyq qorlar qatysty, — dedi Anastasııa Perfıleva.

Ǵalymdar «Qansonar» kınologtarymen birge eldiń barlyq óńirin aralap, ıt ósirýshilermen, ańshylarmen, malshylarmen kezdesken. Onyń nátıjesinde tazy men tóbet tuqymynyń DNQ banki quryldy. Tirkelgen ár ıtten ejelgi tuqymdarmen genetıkalyq baılanysy jáne ózge de biregeı málimetter alynǵan. Endi bul derekter joǵalmaı, ǵylymı turǵyda júıelengen bazada saqtalmaq.

— Kóbi sonda óz ıtiniń úlken ǵylymı qundylyǵy bar ekenin alǵash ret estip bildi, — dedi Anastasııa Perfıleva.

Genetıkalyq taldaý tazynyń óz aldyna derbes, ejelgi ári genetıkalyq turǵydan biregeı tuqym ekenin, basqa shyǵys tazylarymen birdeı emes ekenin kórsetti. Sondaı-aq bul zertteýler tóbettiń álemdegi 140-tan astam tuqym men otar kúzetetin basqa da ıtterden erekshelenetinin dáleldep otyr. Odan bólek osy ýaqyt ishinde 600-den astam ıtke genetıkalyq pasport jasalǵan.

Eske salaıyq, byltyr Halyqaralyq kınologııalyq federatsııanyń Bas komıteti qazaq tazysyn resmı túrde ıt tuqymy dep ádepki taný týraly sheshim qabyldady.

Bıyl Almatyda tazy tuqymynyń eń úzdigi anyqtaldy.